لاہور: مسلم لیگ (ن) نے سینیٹ کے ضمنی انتخاب میں سابق وفاقی وزیر عابد شیرعلی کو ٹکٹ دینے کا باقاعدہ فیصلہ کر لیا ہے، پارٹی ذرائع کے مطابق ن لیگ کے قائد نواز شریف نے مشاورت کے بعد یہ فیصلہ منظور کیا۔
میڈیا رپورٹس کےمطابق ذرائع کا کہنا ہے کہ عابد شیرعلی کو پارٹی قیادت کی جانب سے کاغذاتِ نامزدگی جمع کرانے کی ہدایات جاری کر دی گئی ہیں اور وہ کل سینیٹ کے ضمنی انتخاب کے لیے اپنے کاغذات الیکشن کمیشن لاہور میں جمع کرائیں گے۔
پارٹی رہنماؤں کے مطابق عابد شیرعلی کا پارلیمانی تجربہ، تنظیمی کردار اور پارٹی سے دیرینہ وابستگی انہیں اس نشست کے لیے مضبوط امیدوار بناتی ہے۔
ن لیگ کے حلقوں میں اس فیصلے کو اہم سیاسی پیش رفت قرار دیا جا رہا ہے جبکہ پارٹی رہنماؤں کا کہنا ہے کہ عابد شیرعلی کی سینیٹ میں شمولیت ایوان بالا میں ن لیگ کی پارلیمانی پوزیشن کو مزید مستحکم کرے گی۔
واضح رہےکہ یہ نشست سینئر رہنما اور معروف کالم نگار عرفان صدیقی کے انتقال کے بعد خالی ہوئی تھی، جس کے بعد ن لیگ نے فوری طور پر موزوں امیدوار کی تلاش شروع کی۔
