اسلام آباد :نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف پہاڑی علاقوں میں آئندہ دو دنوں کے دوران ممکنہ لینڈ سلائیڈنگ کے پیشگی الرٹ جاری کر دیا ہے۔
این ڈی ایم اے کے مطابق خیبر پختونخوا، بلوچستان، گلگت بلتستان اور آزاد کشمیر کے پہاڑی اضلاع میں بارش اور برفباری کے نتیجے میں زمین کھسکنے کا خطرہ بڑھ گیا ہے۔
این ڈی ایم اے نے دیر، سوات، کالام، کاغان، چترال، کوہستان، شانگلہ، ایبٹ آباد اور مانسہرہ کے ساتھ مری، گلیات، استور، سکردو، گلگت، ہنزہ، غزر، شگر، باغ اور مظفرآباد میں لینڈ سلائیڈنگ کا امکان ظاہر کیا ہے، بلوچستان کے اضلاع کوئٹہ، زیارت، پشین، چمن، قلعہ عبداللہ، نوشکی، ہرنائی، ژوب، قلعہ سیف اللہ، قلات، مستونگ، آواران، پنجگور اور خضدار میں بھی لینڈ سلائیڈنگ کا خطرہ ہے۔
این ڈی ایم اے نے خاص طور پر قراقرم ہائی وے اور بابوسر روڈ پر لینڈ سلائیڈنگ کے باعث ٹریفک کی روانی متاثر ہونے کا خدشہ ظاہر کیا ہے۔ کاغان، ناران رابطہ سڑک پر بھی لینڈ سلائیڈنگ کے امکان کی وجہ سے ٹریفک میں رکاوٹ متوقع ہے۔
این ڈی ایم اے کی ہدایت ہے کہ شہری برفباری اور بارش کے دوران غیر ضروری سفر سے گریز کریں، سڑکوں کی بندش کی صورت میں ملبہ ہٹانے والی مشینری اور ریسپانس ٹیمیں الرٹ رہیں گی تاکہ ٹریفک کی روانی جلد بحال کی جا سکے۔
