بیروہ میں ترقیاتی کاموں میں مزید سرعت لانے کی کوشش کر رہے ہیں: عمر عبداللہ

سرینگر/جموں و کشمیر کے وزیرِ اعلیٰ عمر عبداللہ نے جمعہ کو کہا کہ ان کی حکومت جموں و کشمیر کے ہر علاقے میں ترقی کو یقینی بنانے کے لیے بھرپور کوششیں کر رہی ہے۔ انہوں نے کہا کہ بیروہ کا دورہ کرنے کا مقصد بھی حلقے میں ترقیاتی سرگرمیوں کو آگے بڑھانا ہے۔
بیروہ کے دورے کے دوران نامہ نگاروں سے گفتگو کرتے ہوئے عمر عبداللہ نے کہا، ’’میں ہر علاقے میں ترقی لانے کی پوری کوشش کر رہا ہوں۔ آج بیروہ آنے کا میرا یہی مقصد تھا۔‘‘
وزیرِ اعلیٰ نے بتایا کہ علاقے میں تقریباً 26 کروڑ روپے مالیت کے ترقیاتی کاموں کا افتتاح کیا گیا، جبکہ کئی دیگر منصوبوں کے سنگِ بنیاد بھی رکھے گئے۔
حلقے کے ساتھ اپنی وابستگی کا ذکر کرتے ہوئے عمر عبداللہ نے کہا کہ 2014 میں بیروہ کے ووٹروں نے ان پر اعتماد کرکے ان کے ساتھ احسان کیا تھا۔ انہوں نے کہا، ’’میں نے یہاں کے لوگوں سے کہا تھا کہ میں زندگی بھر ان کا مقروض رہوں گا۔‘‘
انہوں نے بتایا کہ نالہ سکھ ناگ پر تعمیر کیا گیا پل، جس کا مقامی لوگ طویل عرصے سے مطالبہ کر رہے تھے، مکمل کرکے عوام کے لیے کھول دیا گیا ہے۔
عمر عبداللہ نے مزید کہا کہ علاقے میں دریا کے کناروں کو خوبصورت بنانے کے منصوبے بھی شروع کیے جا رہے ہیں، جن میں واکنگ ٹریک اور بیٹھنے کے لیے ڈیک کی تعمیر شامل ہے۔
بجلی کے بنیادی ڈھانچے سے متعلق وزیرِ اعلیٰ نے کہا کہ ایک نئے ریسونگ اسٹیشن کا سنگِ بنیاد رکھا گیا ہے، جسے آئندہ چار سے پانچ ماہ کے اندر فعال بنانے کی توقع ہے۔
انہوں نے کہا کہ ٹرانسفارمروں کی مرمت کے لیے مقامی ورکشاپ بھی قائم کی جا رہی ہے، تاکہ موسمِ سرما کے دوران لوگوں کو درپیش مشکلات کا ازالہ کیا جا سکے۔ ان کا کہنا تھا، ’’ان شاء اللہ، ہم اس ورکشاپ کو جلد از جلد مکمل کریں گے۔‘‘
مجوزہ ہائی وے کے راستے اور اس کے مقامی کاروبار پر پڑنے والے ممکنہ اثرات سے متعلق سوال کے جواب میں عمر عبداللہ نے کہا کہ حکومت نے یہ معاملہ ہائی وے حکام کے ساتھ اٹھایا ہے۔
انہوں نے کہا، ’’لوگوں کے مطالبات کو مدنظر رکھتے ہوئے ہم نے یہ معاملہ ہائی وے حکام کے ساتھ اٹھایا ہے۔ اب ہم کوشش کریں گے کہ یہاں کے لوگوں کے مطالبات پورے کیے جائیں۔‘‘
بیروہ میں اسٹیڈیم کی تعمیر کے مطالبے پر وزیرِ اعلیٰ نے کہا کہ پہلے اس کے لیے مناسب جگہ کی نشاندہی کی جائے گی، جس کے بعد محکمہ کھیل اس کی تعمیر و ترقی کے لیے اقدامات کرے گا۔