اسلام آباد: علی بابا ڈاٹ کام نے پاکستان میں مقامی برآمد کنندگان اور چھوٹے کاروباری مراکز کی ترقی کے لیے مصنوعی ذہانت پر مبنی جدید ترین نظام ایکیو ورک متعارف کروا دیا ہے۔
نجی ٹی وی کے مطابق اس ڈیجیٹل ٹول کا مقصد ملکی برآمدات کو عالمی معیار کے مطابق ڈھالنا اور کاروباری پیچیدگیوں کو کم کرنا ہے۔
ایکیو ورک ایک خودکار ڈیجیٹل ورک فورس کے طور پر کام کرے گا جو کاروباری عمل کو شروع سے آخر تک مؤثر انداز میں چلانے کی مکمل صلاحیت رکھتا ہے۔
یہ جدید ٹیکنالوجی پاکستانی برآمد کنندگان کو مارکیٹ کے بدلتے ہوئے تقاضوں اور عالمی مسابقت میں کھڑا رہنے میں بھرپور مدد فراہم کرے گی۔
علی بابا ڈاٹ کام کے ہیڈ آف گلوبل سیلز پراڈکٹس اینڈ سروسز ایتھن وانگ نے کہا کہ یہ نظام روایتی سافٹ ویئرز سے یکسر مختلف ہے کیونکہ یہ ایک فعال اور خود مختار ڈیجیٹل ٹیم کی طرح کام کرتا ہے۔
یہ ٹول کاروباری مواقع تلاش کرنے اور بروقت فیصلے کرنے میں معاون ثابت ہوگا۔
انہوں نے مزید کہا کہ ایکیو ورک محض ایک سادہ پروگرام نہیں بلکہ چھوٹے کاروباروں کے لیے ایک مکمل بزنس ایجنٹ ہے جو مارکیٹ ریسرچ، تخلیقی مواد کی تیاری اور کسٹمر انگیجمنٹ کے امور خود سنبھالتا ہے۔ اس سے کاروباری مالکان کو اسٹور مانیٹرنگ میں بے پناہ آسانی پیدا ہوگی۔
مصنوعی ذہانت کا یہ جدید استعمال پاکستانی ایکسپورٹرز کو عالمی مارکیٹ میں اپنی مصنوعات کی بہتر نمائش اور فروخت کے نئے راستے فراہم کرے گا۔
اس ٹول کی بدولت برآمد کنندگان اپنے کاروباری اہداف کو تیز رفتاری سے حاصل کر سکیں گے، جس سے مجموعی ملکی برآمدی حجم میں خاطر خواہ اضافہ متوقع ہے۔
ماہرین کے مطابق ڈیجیٹل دور میں اس طرح کے جدید ٹولز کا استعمال اب ناگزیر ہو چکا ہے تاکہ مقامی کاروبار بین الاقوامی سطح پر اپنی پہچان بنا سکیں۔
علی بابا کی جانب سے فراہم کردہ یہ سہولت ملکی معیشت کی ترقی اور چھوٹے کاروباروں کی ڈیجیٹل منتقلی میں ایک اہم سنگ میل ثابت ہوگی۔
یہ نظام پیچیدہ کاروباری چیلنجز کا فوری اور مؤثر حل فراہم کرنے کی صلاحیت بھی رکھتا ہے جس سے برآمد کنندگان کی مشکلات کافی حد تک کم ہو جائیں گی۔
