دو کروڑ روپے کے مبینہ سرمایہ کاری فراڈ کیس میں ای او ڈبلیو نے چارج شیٹ داخل کی

سرینگر/کرائم برانچ جموں و کشمیر کے اکنامک آفینسز ونگ (ای او ڈبلیو) کشمیر نے تقریباً دو کروڑ روپے کے مبینہ سرمایہ کاری فراڈ کیس میں بڈگام کے ایک شخص کے خلاف عدالت میں چارج شیٹ داخل کی ہے۔ ملزم پر سرمایہ کاروں کو ماہانہ 10 فیصد منافع دینے کا وعدہ کرکے رقم حاصل کرنے کا الزام ہے۔
جاری ایک بیان میں ترجمان نے بتایا کہ ای او ڈبلیو کشمیر نے ایف آئی آر نمبر 07/2025، دفعہ 420 آئی پی سی کے تحت ملزم جنید الاسلام ولد نذیر احمد بابا، ساکن علمدار کالونی، چرار شریف، بڈگام کے خلاف سرینگر کی عدالتِ جنگلاتی مجسٹریٹ میں چارج شیٹ پیش کی ہے۔ترجمان کے مطابق یہ معاملہ ایک تحریری شکایت سے متعلق ہے، جس میں شکایت کنندگان نے الزام لگایا کہ جنید الاسلام نے ان سے رابطہ کرکے دعویٰ کیا تھا کہ وہ بنگلورو میں ای کامرس کمپنی ایمیزون کے ساتھ بطور سرمایہ کار کام کرتا ہے۔
الزام ہے کہ ملزم نے شکایت کنندگان سے رقم حاصل کرتے ہوئے ہر ماہ 10 فیصد منافع دینے کا وعدہ کیا۔ شکایت کنندگان کے مطابق انہوں نے ملزم کو تقریباً دو کروڑ روپے ادا کیے، جس کے بعد وہ بنگلورو چلا گیا اور اس سے رابطہ منقطع ہوگیا۔ترجمان نے بتایا کہ تحقیقات کے دوران ملزم کے زیرِ استعمال یا زیرِ انتظام بینک کھاتوں میں کروڑوں روپے کی رقوم کا سراغ ملا۔ تاہم، ملزم مبینہ طور پر کسی حقیقی سرمایہ کاری کی سرگرمی کا ثبوت پیش کرنے یا وصول کی گئی رقم کا تسلی بخش حساب دینے میں ناکام رہا۔
بیان کے مطابق رقم کی واپسی کے لیے کیے گئے معاہدے اور جاری کیے گئے چیک بھی ادا نہیں ہوئے یا ناکافی رقم کے باعث مسترد ہوگئے۔ تحقیقات کے دوران جمع کیے گئے شواہد سے بقول ترجمان یہ بات سامنے آئی کہ ملزم نے زیادہ منافع کی یقین دہانی کراکے مبینہ طور پر متاثرین کو رقم دینے پر آمادہ کیا، جس سے انہیں مالی نقصان اٹھانا پڑا۔ترجمان نے کہا کہ تحقیقات میں الزامات ثابت ہونے کے بعد چارج شیٹ عدالتی فیصلے کے لیے پیش کی گئی ہے۔
انہوں نے مزید بتایا کہ ای او ڈبلیو کشمیر کی خصوصی ٹیم نے ملزم کو 23 اگست 2026 کو بنگلورو سے گرفتار کیا تھا اور وہ فی الحال سینٹرل جیل سرینگر میں بند ہے۔ سرینگر کے سٹی جج نے اس کی ضمانت کی درخواست بھی مسترد کر دی ہے۔
ایس ایس پی ای او ڈبلیو کشمیر نے عوام کو مشورہ دیا ہے کہ سرمایہ کاری کی کسی بھی اسکیم میں رقم لگانے سے پہلے اس کی اچھی طرح تصدیق کریں، غیر معمولی منافع کے وعدوں سے محتاط رہیں اور مشتبہ مالی دھوکہ دہی کے معاملات کی فوری اطلاع دیں۔