حساس اشیاء کی خرید و فروخت پر پولیس کا کریک ڈاؤن تیز، متعدد اضلاع میں دکانوں کی تلاشی

سرینگر/جموں و کشمیر پولیس نے غیر مجاز فروخت اور حساس اشیاء کے ممکنہ غلط استعمال کو روکنے کے لیے مختلف اضلاع میں معائنوں کا سلسلہ تیز کر دیا ہے۔ اس دوران کھاد، کیمیکل، کیڑے مار ادویات اور ہارڈویئر کی دکانوں سمیت دیگر تجارتی اداروں کا معائنہ کیا جا رہا ہے تاکہ متعلقہ لائسنس، اجازت ناموں اور ضروری ریکارڈ کی جانچ کی جا سکے۔
بارہمولہ ضلع کے پٹن علاقے میں پولیس نے ہارڈویئر کی دکانوں، کیڑے مار ادویات کے مراکز اور کار ڈیلرشپ کا معائنہ کیا۔ اس دوران لائسنس، اجازت ناموں اور لازمی ریکارڈ کی جانچ کی گئی۔ پولیس کے مطابق معائنہ کیے گئے تمام ادارے متعلقہ ضوابط کی پابندی کرتے ہوئے پائے گئے۔
ریاسی ضلع میں پولیس نے کھاد، کیمیکل اور دیگر ضابطہ بند اشیاء کی فروخت کرنے والی 62 دکانوں کا معائنہ کیا۔ اس دوران اسٹاک کی تفصیلات اور فروخت کے رجسٹروں کی جانچ کی گئی۔ دکانداروں کو ہدایت دی گئی کہ وہ مناسب ریکارڈ برقرار رکھیں اور اپنی دکانوں میں سی سی ٹی وی کیمرے نصب کریں۔ اس کے علاوہ میڈیکل اسٹورز، سم کارڈ فروخت کرنے والوں اور آن لائن خدمات فراہم کرنے والے اداروں کا بھی معائنہ کیا گیا۔
بانڈی پورہ پولیس نے اجس علاقے میں سم کارڈ فروخت کرنے والے دکانداروں جبکہ پولیس اسٹیشن ارگام اور پولیس پوسٹ سملر کے دائرہ اختیار میں کھاد کی دکانوں کی جانچ کی۔ اس دوران کاروباری افراد کو درست ریکارڈ رکھنے اور نگرانی کے نظام کو مزید مضبوط بنانے کی ہدایات دی گئیں۔
ضلع رام بن میں بھی پولیس نے کھاد، بیج اور دھماکہ خیز مواد سے متعلق کاروبار کرنے والی دکانوں کا معائنہ کیا۔ اس دوران ذخیرے، لائسنس اور دیگر ضروری دستاویزات کی جانچ کی گئی تاکہ ضابطہ بند اشیاء کی غیر مجاز فروخت یا غیر قانونی مقاصد کے لیے منتقلی کو روکا جا سکے۔
پولیس کے مطابق یہ کارروائیاں حفاظتی اقدامات کا حصہ ہیں، جن کا مقصد حساس تجارتی اشیاء کی فراہمی پر نگرانی مضبوط بنانا اور کسی بھی ممکنہ خلاف ورزی کی بروقت نشاندہی کرنا ہے، تاکہ ان اشیاء کو غیر قانونی سرگرمیوں کے لیے استعمال ہونے سے روکا جا سکے۔