ڈی ایم سی حکام نے پہلے موجود کروڑوں روپے کے واجبات ادا کرنے کے بجائے ذاتی مفاد کیلئے مزید نئے ٹینڈرز کر ڈالے
صرف کیماڑی زون میں کروڑوں روپے لاگت کے 64 ترقیاتی منصوبوں کی بندر بانٹ کی گئی ہے، سینئر کنٹریکٹرز کی صورتحال پر تشویش
کراچی(وقا ئع نگار خصوصی)بلدیہ ضلع غربی کو اربوں کا مقروض بنانے کا منصوبہ،ڈی ایم سی حکام نے پہلے سے موجودکروڑوں کے واجبات ادا کرنے کے بجائے ذاتی مالی مفادات کیلئے مزید نئے ٹینڈرز کر ڈالے،ضلع غربی کے صرف کیماڑی زون میںکروڑوں لاگت کے64 ترقیاتی کاموں کی بندر بانٹ کردی گئی ،ٹھیکوں میں غیر قانونی طور پر واٹر سیوریج لائنوں کی درستگی کے کام بھی شامل کئے گئے،انتہائی باوثوق ذرائع کے مطابق بلدیہ ضلع غربی کے حکام نے ادارے کو ٹھیکیداروں کا اربوں کا مقروض بناکر روانہ ہونے کا منصوبہ تیار کرلیا ہے،ذرائع کا کہنا ہے کہ ضلع غربی پر کئی کروڑ روپے کے واجبات پہلے سے موجود ہیں جس کی ادائیگی کرنے کے بجائے کروڑوں لاگت کے مزید ٹینڈرز کرنے کا سلسلہ شروع ہوگیا ہے،ذرائع کا کہنا ہے کہ موجودہ بلدیاتی نمائندوں کے جانے کے بعد نئے آنے والے بلدیاتی نمائندے صرف قرض اتارنے تک محدود رہ سکیں گے۔دریں اثناء شہر کے سینئر کنٹریکٹرز نے ضلع غربی کی جانب سے سابقہ ادائیگیاں کئے بغیر نئے ٹینڈرز کی بھرمار پر سخت تشویش کا اظہار کرتے ہوئے اعلی حکام اور تحقیقاتی اداروں سے فوری نوٹس لینے کی اپیل کی ہے،سینئر کنٹریکٹرز کا کہنا ہے کہ اپنے ذاتی مالی مفادات کیلئے ضلع غربی کو اربوں کا مقروض بنانے کی خوفناک سازش کی جارہی ہے جس سے ٹھیکیدار بھی در در کی ٹھوکریں کھانے پر مجبور ہوجائینگے ۔