کراچی پریس کلب کے سامنے علامتی بھوک ہڑتال کو ایک ماہ مکمل، کوئی حکومتی نمائندہ نہیں آیا
پولیس اور انتظامیہ نے ہمارے امن مارچ کو طاقت سے روکنے کی کوشش کی تو تمام تر ذمہ داری حکومت کی ہوگی، ہیڈ ماسٹرز
کراچی (اسٹاف رپورٹر) آئی بی اے ٹیسٹ ہیڈ ماسٹرز کی علامتی بھوک ہڑتال کو ایک ماہ مکمل ہوچکا ہے، حکومت کا کوئی نمائندہ دادرسی کرنے نہیں آیا۔ آج وزیراعلیٰ ہائوس کی جانب پُرامن مارچ کے بعد مستقلی کے لیے یادداشت نامہ جمع کروایا جائے گا۔ ہیڈ ماسٹرز مستقلی کے مطالبے کی منظوری کے لیے کراچی پریس کلب پر گزشتہ ایک ماہ سے سراپا احتجاج ہیں۔ اساتذہ کا کہنا تھا کہ ہمارا مارچ پرامن ہوگا، کراچی پولیس و ضلعی انتظامیہ نے اگر ہم پر تشدد کا راستہ اختیار کیا تو اس کی ذمہ دار حکومت ہوگی۔ ایک طرف محکمہ تعلیم سندھ کے جن ہیڈ ماسٹرز کی تسلی بخش کارکردگی کی ضمانت عالمی بینک دے چکا ہے دوسری طرف سندھ حکومت کی پولیس کی جانب سے اساتذہ کو تشدد کا نشانہ بنایا گیا اور وہ اپنی مستقلی کے لیے ایک ماہ سے سراپا احتجاج ہیں۔