ملک بھر کی تاجر تنظیموں کے ساتھ ہیں ٗ ایف بی آر کی پالیسیوں کیخلاف 29 اور30اکتوبر کو شٹر ڈائون رہے گا ٗ ایس ایم عالم
جب تک تاجروں کے مسائل حل نہیں ہونگے ٗ احتجاج جاری رہے گا ٗ چیئرمین اولڈ سٹی ایریا تاجر اتحاد کی میڈیا سے گفتگو
کراچی( کامرس رپورٹر) کراچی کے تاجروں نے ایف بی آر کی تاجر دشمن پالیسیوں کیخلاف دو روزہ ہڑتال کی مکمل حمایت کردی کراچی کا سب سے بڑا تجارتی علاقہ اولڈ سٹی ایریا بھی29 اور30 اکتوبر کو مکمل بند رکھنے کا اعلان کردیا گیا اولڈ سٹی ایریا تاجر اتحاد کے چیئرمین ایس ایم عالم نے میڈیا سے گفتگو کرتے ہوئے کہا کہ ہم ملک کی تاجر تنظیموں کے ساتھ ہیں29اور30 اکتوبر کو اولڈ سٹی ایریا میں مکمل شٹر ڈائون ہوگا اور کوئی دکان نہیں کھولی جائیگی ایس ایم عالم نے کہا کہ حکومت کی ناقص پالیسیوں سے کاروبار مکمل طور پر تباہ ہوگیا ہے۔ تاجروں میں شدید ظم و غصہ پایا جاتا ہے۔ ہم ٹیکس دینے سے انکار نہیں کررہے لیکن اس کیلئے وہ طریقہ کار بنایا جائے جو سب کیلئے قابل قبول ہو حکومت تاجروں سے تجاویز تو طلب کرتی ہے لیکن ان پر کوئی عملدرآمد نہیں ہوتا ہم حکومت کو بتانا چاہتے ہیں کہ تاجر لاوارث نہیں ہیں۔ ایف بی آر کی پالیسیوں کیخلاف ہمار ا احتجاج اس وقت تک جاری رہے گا جب تک ہمارے مطالبات تسلیم نہیں کئے جاتے29 اور30 اکتوبر کو دو روزہ شٹر ڈائون ہڑتال ہوگی لیکن اگر مطالبات نہ مانے گئے تو تاجر غیر معینہ مدت کی ہڑتال بھی کرسکتے ہیں جس کی تمام تر ذمہ داری وفاقی حکومت پر عائد ہوگی ایس ایم عالم نے تاجر برادری سے بھی کہا کہ وہ اپنی صفوں میں اتحاد برقرار رکھیں اور کسی بھی قسم کے منفی پروپیگنڈے سے خوفزدہ نہ ہوں ہماری پر امن جدوجہد مطالبات کی منظوری تک جاری رہے گی۔