حکومت نے کسٹم کلیئرنس دستاویزات اور ایکسائز رجسٹریشن کی جانچ پڑتال بھی شروع کردی ہے
ایف آئی اے کی شرائط پر عملدرآمد کے حوالے سے محکمہ داخلہ پنجاب نے محکمہ ایکسائز سے کوائف طلب کرلئے
لاہور (مانیٹرنگ ڈیسک) حکومت نے فنانشل ایکشن ٹاسک فورس (ایف اے ٹی ایف) کی شرائط پر عمدرآمد کے حوالے سے کالعدم تنظیموں اور ان کی ذیلی فلاحی تنظیموں کے زیر استعمال امپورٹ کی جانے والی غیر ملکی ساختہ گاڑیوں بالخصوص ایمبولینسز کی کسٹم کلیئرنس دستاویزات اور ایکسائز رجسٹریشن کی جانچ پڑتال شروع کر دی ہے، اس حوالے سے محکمہ داخلہ پنجاب نے محکمہ ایکسائز سے کوائف طلب کیے جو محکمہ نے گزشتہ روز فراہم کر دیے ہیں جبکہ ان گاڑیوں کی رجسٹریشن کے وقت پیش کردہ کسٹم کلیئرنس دستاویزات کی تصدیق کے لیے کسٹم حکام سے بھی رابطہ کیا جارہا ہے۔ ایف اے ٹی ایف کی ہدایات پر حکومت نے کالعدم تنظیموں کے اثاثوں، بنک اکائونٹس اور گاڑیوں کے حوالے سے کارروائی شروع کر رکھی ہے اور انہیں سرکاری تحویل میں لیا جارہا ہے۔ محکمہ داخلہ پنجاب کی جانب سے ایک کالعدم تنظیم (جس کا ہیڈ کوارٹرز مریدکے میں ہے) کے اثاثہ جات ضبط کرنے کی کارروائی کے دوران مختلف شہروں کے ڈپٹی کمشنرز نے محکمہ داخلہ کو یہ رپورٹس ارسال کی ہیں کہ مذکورہ تنظیم اور اس کی ذیلی فلاحی تنظیم کے نام پر رجسٹرڈ 30 سے زائد گاڑیاں حکومت کے سپرد نہیں کی جارہی ہیں۔