کراچی: پولیس نے بلڈر سے بھتہ طلب کرنے والے مطلوب ملزم کو گرفتار کر کے اسلحہ برآمد کرلیا۔ پولیس کے مطابق گرفتار مبینہ بھتہ خور ایوب نے ایک ماہ قبل ساتھیوں کے ساتھ مل کر یونیورسٹی روڈ پر بلڈر سے بھتہ مانگا تھا، ملزم ساتھیوں کے ساتھ مل کر بھتہ وصولی کے لیے باکڑا ہوٹل اور آٹا چکی پر بھی فائرنگ کر چکا ہے۔
تفصیلات کے مطابق پولیس نے بتایا کہ بلڈر کو بھتے کی پرچی اور پستول کی گولیاں دینے میں ملوث ملزم کے دو ساتھی اس سے پہلے ہی گرفتار ہوچکے ہیں جن کا تعلق گینگ وار احمد مگسی گروپ سے ہے جب کہ ساتھیوں کی گرفتاری کے بعد ملزم ایوب روپوش ہوگیا تھا۔
پولیس کا کہنا ہے کہ ملزم اقدام قتل، بھتہ خوری اور دیگر سنگین وارداتوں میں ملوث تھا جب کہ ملزم سے مزید تفتیش کی جا رہی ہے۔