اسلام آباد: بلاول بھٹو زرداری نے کہا ہے کہ یہ تاثر غلط ہے کہ کچھ اپوزیشن سینیٹرز نے جان بوجھ کر غلط مہر لگائی، کسی سینیٹر نے غلط مہر نہیں لگائی، مجھے اپوزیشن کے تمام سینیٹرز پر مکمل اعتماد ہے۔
آصف علی زرداری کی جانب سے پیپلز پارٹی کے سینیٹرز کے عشایے میں گفتگو کرتے ہوئے بلاول بھٹو زرداری نے کہا کہ سیکریٹری سینیٹ کی ہدایات کی روشنی میں سینیٹرز کو امیدوار کے خانے میں کہیں بھی مہر لگانے کی ہدایات دی گئی تھیں، اپوزیشن کے تمام سینیٹرز نے سید یوسف رضا گیلانی کو ووٹ دیا۔
انہوں نے کہا کہ پاکستان پیپلز پارٹی، مسلم لیگ (ن)، جمعیت علمائے اسلام اور عوامی نیشنل پارٹی سمیت اپوزیشن کی تمام جماعتیں پی ڈی ایم کے پلیٹ فارم پر متحد ہیں، کیمروں کی تنصیب کا معاملہ واٹر گیٹ کی طرح ایک بڑا اسکینڈل ہے، پریذائیڈنگ آفیسر کا فیصلہ جلد ہائی کورٹ میں چیلنج کریں گے۔
بلاول نے کہا کہ ہمیں انصاف کی امید ہے، پارلیمان میں سلیکٹڈ عمران خان کے خلاف ہم نے بڑی کامیابیاں سمیٹی ہیں، عمران خان کی حکومت اپنا اعتماد کھوچکی ہے، پارلیمان کے ذریعے ہم حکومت کا خاتمہ کرسکتے ہیں، پارلیمان سے استعفے دینے یا نہ دینے کا معاملہ اہم ہے اس بات کا فیصلہ پی ڈی ایم کے پلیٹ فارم سے کریں گے۔