ویب ڈیسک —
صدر جو بائیڈن نے جمعرات کے روز میامی پہنچنے کے بعد ساحلِ سمندر کے قریب منہدم ہونے والی ایک کیثر منزلہ رہائشی عمارت کے ملنے میں دبے لاپتا افراد کی تلاش کی کوششوں اور تعمیر نو کے لیے وفاقی مدد کی پیش کش کے ساتھ متاثرہ خاندانوں کے ساتھ ہمدردی کا اظہار کیا۔
بائیڈن کے آنے سے پہلے ریسکو مشن کو روک دیا گیا تھا، کیونکہ باقی ماندہ عمارت کے گرنے کے خدشات موجود ہیں۔
صدر نے کہا کہ انہیں یقین ہے کہ وفاقی حکومت تلاش اور صفائی کے تمام اخراجات کا بوجھ اٹھانے کا اختیار رکھتی ہے۔ انہوں نے مقامی عہدیداروں سے مدد کے لئے واشنگٹن سے رابطہ کرنے کا کہا۔
بائیڈن کو اس تباہی کے بارے میں، جس کی اس سے قبل کوئی نظیر موجود نہیں ہے، بریفنگ دی گئی جس میں فلوریڈا کے گورنر رون ڈی سینٹس اور میامی ڈیڈ کاؤنٹی کی میئر ڈینیلا لیون کاوا بھی موجود تھیں۔
صدر جو بائیڈن اور خاتون اول جمعرات کی صبح وائٹ ہاؤس سے رخصت ہونے کے بعد ائیر فورس ون کے ذریعے میامی انٹرنیشنل ایئرپورٹ پہنچے تھے۔
مقامی عہدے داروں نے بتایا ہے کہ بدھ کو ملبے سے مزید دو افراد کی باقیات ملنے کے بعد ہلاک ہونے والوں کی تعداد بڑھ کر 18 ہو گئی ہے، جن میں دو بچے بھی شامل ہیں۔
اس سے قبل وائٹ ہاؤس کی پریس سیکرٹری جین ساکی نے کہا تھا کہ صدر اور خاتون اول ملبے میں دب جانے والے افراد کے عزیزوں سے ملاقات کریں گی جنہیں یہ المناک سانحہ برداشت کرنا پڑ رہا ہے۔ اس کے علاوہ وہ سانحہ کے فوری بعد مدد کے لیے موقع پر پہنچنے والوں اور ریسکیو ٹیموں کا بھی شکریہ ادا کریں گے۔
جین ساکی نے بدھ کے روز بریفنگ میں نامہ نگاروں سے بات کرتے ہوئے کہا کہ سانحے کے مقام پر ابھی بھی تلاش اور زندگیاں بچانے کی کوششیں جاری ہیں، اور ہم یہ یقینی بنانا چاہتے ہیں کہ اس سلسلے میں تمام دستیاب وسائل کو بروئے کار لایا جائے۔
میامی ڈیڈ کاؤنٹی کی میئر ڈینیلا لیون کاوا نے بدھ کی شام اپنی ٹوئٹس میں بتایا 145 افراد ابھی تک لاپتا ہیں۔
ان کا کہنا تھا کہ ہم، ہماری قوم ،اور دنیا ان خاندانوں کے غم میں شریک ہے جنہیں ہم کھو چکے ہیں۔ ہم ان تمام خاندانوں کے لئے دعا گو ہیں۔
فلوریڈا کے گورنر رون ڈی سینٹس نے کہا کہ لاپتا افراد کی تلاش کے لیے جاری آپریشن، سمندری طوفانوں سے نمنٹے کی کارروائیوں کے بعد ریاست کی تاریخ کا سب سے بڑا امدادی آپریشن ہے۔
ان کا کہنا تھا کہ جنہیں ہم کھو چکے ہیں، ہم میں سے کوئی بھی انہیں کبھی نہیں بھلا سکتا۔
انہوں نے مزید کہا کہ متاثرہ خاندانوں کے افراد کی مدد کے لئے ذہنی صحت کے وسائل مہیا کیے جا رہے ہیں۔
میامی ڈیڈ کاؤنٹی کے فائر چیف ایلن کومنسکی نے دن رات مسلسل جاری امدادی کوششوں کے بارے میں بتایا کہ یہ آپریشن بہت خطرناک نوعیت کا ہے۔ ان کا کہنا تھا کہ ہم ان افراد کو ڈھونڈ رہے ہیں جو ممکن ہے کہ ملبے کے نیچے ابھی تک زندہ ہوں۔
ان کا کہنا تھا کہ یہ تلاش اور زندگیاں بچانے کا مشن ہے۔
کومنسکی نے کہا کہ ریسکو ٹیمیں ڈھونڈنے میں مدد دینے والے کتے اورجدید سائنسی آلات استعمال کر رہی ہیں۔
24 جون کو اس 12 منزلہ اپارٹمنٹ بلڈنگ کے تقریبا نصف، 136 یونٹ آن کی آن میں زمین بوس ہو گئے تھے۔
فلوریڈا کے ایمرجنسی کی صورت حال سے نمنٹے والے عہدیداروں نے بتایا ہے کہ اگلے ہفتے ایک سمندری طوفان کا ممکنہ خطرہ موجود ہے۔ اس صورت حال کے پیش نظر ہم عمارت گرنے کے مقام پر امدادی کارروائیاں جاری رکھے رہنے کی تیاری کر رہے ہیں۔
اس تباہی کی وجوہ جاننے کے لیے تحقیقات جاری ہیں۔ 2018 کی ایک انجینئرنگ رپورٹ میں بتایا گیا ہے کہ عمارت کے پارکنگ گیراج کے ڈھانچے، اور عمارت کے تالاب کے نیچے کنکریٹ کی ایک سلیب کو بڑے پیمانے پر نقصان پہنچا تھا۔
عمارت گرنے سے قبل اس کی مرمت کی تیاری ہو رہی تھی جس پر لاکھوں ڈالر اخراجات کا تخمینہ تھا۔