انوکھا ‘ریزر زیفر’ فیس ماسک جو جراثیموں کو فلٹر کرنے کے لیے 99 فیصد تک مؤثر ہے

2021 کا 8 واں مہینہ چل رہا ہے اور کورونا وائرس کی وبا کے پھیلاؤ میں فی الحال تو کوئی کمی نہیں آسکی۔

یعنی آنے والے مہینوں میں فیس ماسک کا استعمال جاری رہے گا اور اسی کو دیکھتے ہوئے کمپنیوں کی جانب سے ان ماسکس کو منفرد بنانے پر کام کیا جارہا ہے۔

ایسا ہی ایک کانسیپٹ فیس ماسک کمپیوٹر تیار کرنے کے لیے معروف کمپنی ریزر نے لاس ویگاس میں سی ای ایس ٹیکنالوجی نمائش کے دوران متعارف کرایا تھا۔

اس وقت فیس ماسک کو پراجیکٹ ہیزل کا نام دیا گیا تھا اور اب اسے کمرشل پراڈکٹ کی شکل دینے میں مزید پیشرفت ہوئی ہے۔

کمپنی کی جانب سے اب اس فیس ماسک کو ریزر زیفر کا نام دیا گیا ہے اور لوگ اسے ٹیسٹ کرنے کے لیے سائن اپ ہوسکتے ہیں۔

کمپنی کے مطابق یہ فیس ماسک جراثیموں کو فلٹر کرنے کے لیے 99 فیصد تک مؤثر ہے اور یہ رواں سال کے آخر تک دستیاب ہوگا۔

اس فیس ماسک کے مزید فیچرز تو کمپنی کی جانب سے نہیں بتائے گئے مگر جنوری میں اس نے بتایا تھا کہ ماسک میں ایک ایکٹیو وینٹی لیشن جز دیا گیا ہے جو تازہ ہوا میں سانس لینے کا موقع فراہم کرتا ہے۔

Project Hazel is now officially Razer Zephyr – the latest evolution of our wearable air purifier. Designed to be safe, social and sustainable, Razer Zephyr sports 99% BFE, a secure silicon face seal and anti-fog coating. Join our community beta test: https://t.co/mlex2YSMpi pic.twitter.com/yLUj0lO2oJ

— R Λ Z Ξ R (@Razer) August 6, 2021

یہ فیس ماسک اپنی شکل بدل کر شفاف بھی ہوجاتا ہے تاکہ دیگر افراد آپ کا منہ بھی دیکھ سکیں۔

اس ماسک میں بلٹ ان مائیک اور ایمپلی فائر موجود ہے تاکہ بات کرنے کے دوران آواز کا معیار متاثر نہ ہوسکے۔

اس فیس ماسک میں آر جی بی ریڈ لائٹس بھی دی گئی ہیں، جو ماسک کو چارج کرتے ہوئے جگمگانے لگتی ہیں یا اس وقت مدھم ہوجاتی ہیں جب ماسک سے منہ کو ڈھانپا نہ جائے۔

اس ماسک کے ساتھ ایک خاص کیس بھی چارجنگ کے لیے دیا جائے گا اور اسی میں الٹرا وائلٹ ٹیکنالوجی سے اس کی صفائی بھی ہوگی۔

کمپنی کا کہنا تھا کہ ماسک میں لگے وینٹی لیٹر پورے دن تک کام کرسکتے ہیں اور کئی ہفتوں تک لگاتار استعمال کرکے نئے فلٹر کو آسانی سے لگایا جاسکتا ہے۔

منبع: ڈان نیوز