پٹنہ(ساوتھ ایشین وائر):31 اکتوبر کو بھارت کی مختلف ریاستوں کے مختلف شہروں میں 152 دوردرشن ریلے سنٹرزبندہو جائیں گے۔ جبکہ بہار کے 15 اضلاع میں واقع دوردرشن ریلے مراکز سال کے آخری دن 31 دسمبر کو بند کئے جارہے ہیں۔
412 ریلے سنٹرزتین مراحل میں بند ہوں گے۔دوردرشن سٹیشنزکو بند کرنے کا فیصلہ ڈائریکٹر پرسار بھارتی پبلک سروس براڈکاسٹر دوردرشن ، نئی دہلی نے کیا ہے۔ مرکزی حکومت نے دوردرشن مرکز بند کرنے کی مختلف تاریخیں بھی جاری کی ہیں۔ بھارت بھر میں 466 دوردرشن ریلے سٹیشن چل رہے ہیں۔ بہار کے بیگوسرائے ، لکھی سرائے ، منگر ، سکندرا اور بنکا اضلاع میں دوردرشن مرکز کا مینٹیننس سنٹر (ڈی ایم سی)بھاگلپور ہے۔ بھاگلپور میں 500 واٹ کا دوردرشن مرکز 31 اکتوبر سے بند ہو جائے گا۔ تاہم ، ڈی ایم سی سال کے آخر تک کام کرے گی۔
بہار کے سہرسہ سمیت مظفر پور اور کٹیہار میں ہائی پاور ٹرانسمیٹر دوردرشن سنٹر چل رہے ہیں۔ جبکہ بنکا ، بیگوسرائے ، لکھی سرائے ، منگر ، سکندرا ، اورنگ آباد ، گیا ، جموئی ، نواڈا ، شیخ پورہ ، بتیہ ، موتیہاری اور رام نگر میں لو پاور (ایل پی ٹی)دوردرشن سنٹر ہیں۔ یہ تمام مراکز رواں سال 31 دسمبر کو بند ہو جائیں گے۔ سارسہ سمیت بھاگلپور اور کٹیہار دوردرشن مرکز کے انچارج سینئر اسسٹنٹ انجینئر ڈی ایس پرساد نے میڈیا کو بتایا کہ جن دوردرشن مرکز کو بند کرنے کا فیصلہ کیا گیا ہے۔ ان میں تین اضلاع میں کام کرنے والے مراکز 31 اکتوبر کو اور دیگر مراکز 31 دسمبر کو بند کر دئے جائیں گے۔
مختلف ریاستوں کے شہروں میں چلنے والے پرسار بھارتی دوردرشن مرکز کو تین مراحل میں بند کرنے کا فیصلہ کیا گیا ہے۔ اس میں بھارت کے 151 بشمول 108 ڈیجیٹل ٹرانسمیٹر ریلے سنٹر 31 مارچ 2022 کو بند ہو جائیں گے۔ 31 دسمبر 2021 کو 109 اور 31 اکتوبر کو152 دوردرشن مراکز بند کرنے کا فیصلہ کیا گیا ہے۔ جبکہ 54 مراکز کے لیے ابھی تک کوئی فیصلہ نہیں کیا گیا جو جموں و کشمیر ، لداخ ، سکم ، انڈمان اور نیکوبار اور لکشدیپ میں واقع ہیں۔
دوردرشن 1959 میں شروع کیا گیا تھا۔ دوردرشن کے ٹیلی کاسٹ کے لیے ہر شہر میں ریلے سنٹر قائم کیے گئے تھے۔ دوردرشن چینل کو اینٹینا کے ذریعے ٹیلی ویژن پر نشر کیا جارہا تھا۔ موجودہ دور میں ، اب ڈی ٹی ایچ پلیٹ فارم دوردرشن سمیت دیگر چینلز کو نشر کر رہا ہے۔ اس کی وجہ سے ان مراکز کی ضرورت ختم ہو گئی ہے۔ جس کی وجہ سے ، ریلے سنٹر کو بند کرنے کا فیصلہ کیا گیا ہے۔