صدر ڈاکٹر عارف علوی نے فاصلاتی نظام تعلیم اور انفارمیشن ٹیکنالوجی کے ذریعے تعلیمی سہولیات کی فراہمی کی ضرورت پر زور دیا ہے جولوگوں کی بڑی تعداد کی دسترس میں ہے ۔
ایوان صدر اسلام آباد میں ورچوئل یونیورسٹی آف پاکستان کی بریفنگ کے موقع پر انہوں نے ورچوئل یونیورسٹی کے دائرہ کار میں توسیع دینے پر زور دیا تا کہ ملک کے دور دراز علاقوں کے طلبہ بھی آن لائن تعلیم سے فائدہ اٹھا سکیں۔
صدر نے ورچوئل یونیورسٹی کی انتظامیہ سے کہا کہ جدید دور کے تقاضوں کے مطابق نیا تصور اور مستقبل کے منصوبے تیار کیے جائیں اور اہداف کے حصول کیلئے مدت کا تعین کیا جائے۔ور چوئل یونیورسٹی کے ریکٹر ڈاکٹر ارشد سلیم بھٹی نے یونیورسٹی کے کردار کے بارے میں بریفنگ دیتے ہوئے کہا کہ اس وقت یونیورسٹی کے مختلف شعبوں میں ایک لاکھ طلبہ زیرِ تعلیم ہیں۔یونیورسٹی اپنے چار ٹی وی چینلز پر لیکچر نشر کرنے سمیت طلبہ کو جدید مہارتوں کی تربیت فراہم کر رہی ہے۔