ویب ڈیسک —
برطانوی عہدے داروں نے بتایا ہے کہ برطانوی پارلیمنٹ کے ایک رکن جنوب مشرقی برطانیہ میں اپنے آبائی ڈسٹرکٹ کے ایک چرچ میں جمعے کو اس وقت کئی بار چاقو کے وار کے بعد ہلاک ہو گئے جب وہ اپنے حلقے کے ووٹروں سے ملاقات کر رہے تھے۔
69 سالہ ڈیوڈ امیس قدامت پسند پارٹی کے ایک رکن تھے اور انگلینڈ کے ایسیکس میں ساوتھ اینڈ ویسٹ کی نمائندگی کرتے تھے۔
پولیس کا کہنا ہے کہ ایک 25 سالہ مشتبہ شخص حراست میں ہے۔
ایسیکس پولیس نے ایک بیان میں کہا ہے کہ ’’ہم اس واقعے کے سلسلے میں کسی اور کی تلاش نہیں کر رہے ہیں؛ اور ہمارے خیال میں اس وقت عوام کو کوئی خطرہ لاحق نہیں ہے”۔
امیس، جو 1983 سے رکن پارلیمنٹ تھے، شادی شدہ تھے اور ان کے پانچ بچے ہیں۔
اس رپورٹ کے لئے کچھ معلومات ایسو سی ایٹڈ پریس اور رائٹرز سے لی گئی ہیں۔