تحریک انصاف کے سینئر رہنما اور صوبائی وزیر خوراک عبدالعلیم خان نے اپنی وزارت سے استعفیٰ دیدیا ہے۔ انہوں نے اپنی ٹویٹ میں کہا ہے کہ سماء چینل خریدنے کے بعد غیر جانبداری برقرار رکھنے کیلئے وزارت سے مستعفی ہو رہا ہوں۔
سماجی رابطے کی ویب سائٹ ٹویٹر پر جاری بیان میں عبدالعلیم خان کا کہنا تھا کہ وزیراعظم عمران خان سے آج ہونے والی ملاقات میں انہیں قائل کیا کہ اپنے نیوز چینل سماء نیوز کے حوالے سے غیر جانبداری قائم رکھنے کیلئے ضروری ہے کہ میرے پاس کوئی حکومتی عہدہ نہ ہو۔
ان کا کہنا تھا کہ لہٰذا بطور سینئر وزیر اور وزیر خوراک حکومت پنجاب اب میرا استعفیٰ قبول فرما لیں، میں اُن کا ممنون ہوں، انہوں نے میری یہ گزارش تسلیم فرما لی ہے۔ میں اپنا استعفیٰ وزیراعلیٰ پنجاب کو بھجوا رہا ہوں۔
وزیراعظم عمران خان سے آج ھونے والی ملاقات میں اُنہیں قائل کیا ھے اپنے نیوز چینل سماء نیوز کے حوالے سے غیر جانبداری قائم رکھنے کے لئے ضروری ھے میرے پاس کوئی حکومتی عہدہ نہ ھو لہذا وہ بطور سینئر وزیر/وزیر خوراک حکومت پنجاب اب میرا استعفی قبول فرما لیں۔ 1/2
— Abdul Aleem Khan (@aleemkhan_pti) November 26, 2021
خیال رہے کہ رواں سال ستمبر میں پاکستان الیکٹرونک میڈیا ریگیولیٹری اتھارٹی کی جانب سے منظوری کے بعد سماء ٹی وی کے حصص عبدالعلیم خان اور ان کی صاحبزادی کی ملکیت رئیل اسٹیٹ کمپنی پارک ویو لمیٹڈ کو منتقل کر دئیے گئے تھے۔
بی بی سی نے بتایا تھا کہ اجلاس کے دوران بلوچستان سے پیمرا کے رکن فرح عظیم شاہ نے سما ٹی وی چلانے والی کمپنی جاگ براڈکاسٹنگ سسٹمز لمیٹڈ کی درخواست منظور کرنے کے اس فیصلے کی مخالفت کی تھی، جس میں انہوں نے انتظامیہ کی تبدیلی اور اس کے حصص لاکھوں کے واجبات ادا کیے بغیر منتقلی کی درخواست کی تھی۔