یمن کے دارالحکومت صنعا میں فٹبال کی جیت کے جشن کے دوران فائرنگ سے کم از کم 5 افراد ہلاک اور 124 زخمی ہو گئے۔ چینی خبر رساں ادارے نے صحت کے مقامی حکام کے حوالے سے بتایا کہ یمن کی انڈر 16 لڑکوں کی فٹ بال ٹیم نے سعودی عرب کو شکست دے کر ویسٹ ایشیا جونیئر فٹ بال چیمپئن شپ جیتنے کے بعد گزشتہ روز جشن منایا اور جیت کی خوشی میں فائرنگ کی جس کے باعث بہت سے لوگ ہلاک اور زخمی ہو گئے۔ یہ واقعہ رونما ہونے کے بعد حکام نے شہریوں پر زور دیا ہے کہ وہ ذمہ دارنہ طور پر اپنی خوشی کا اظہار کریں اور فائرنگ اور اس طرح کی دیگر سرگرمیوں سے پرہیز کریں۔