اکرا (انٹرنیشنل ڈیسک) مغربی گھانا میں بارودسے بھرا ٹرک پھٹنے سے 17افراد ہلاک ہوگئے۔ حکام نے بتایا کہ حادثہ اس وقت رونما ہوا، جب سونے کی ایک کان کے لیے بارودی مواد لے کر جانے والا ایک ٹرک ایک موٹر سائیکل سے ٹکرا گیا۔ اس حادثے کے بعد ٹرک میں زور دھماکا ہوا اور قریبی علاقہ بھی اس کے اثرات کی لپیٹ میں آ گیا۔ دھماکے کے باعث 500سے زائد قریبی عمارتوں کو نقصان پہنچا،جب کہ ایک قصبے کا نام و نشان مٹ گیا۔ حکا م کا کہنا ہے کہ ابتدائی امدادی کارروائیوں کے دوران 59زخمیوں کو اسپتال منتقل کیا گیا،جب کہ مکانات کے ملبے تلے دبے افراد کو نکالنے کے لیے کوشش جاری ہے۔ ہلاکتوں میں اضافے کا بھی خدشہ ہے۔ حادثے کا شکار ہونے والے ٹرک میں دھماکا خیز مواد سے بھری پیٹیاں موجود تھیں، جنہیں کان کنی کی غرض سے لے جایا جا رہا تھا۔ شدید دھماکے کے باعث زمین میں کئی فٹ گہرا گڑھا پڑ گیا ۔ واقعہ گنجان آباد علاقہ میں پیش آنے کی وجہ سے دھماکے سے بہت نقصان ہوا ہے۔ حادثے کی جگہ سے اٹھنے والے دھوئیں اور راکھ کے بادل نے وسیع علاقے کو اپنی لپیٹ میں لے لیا۔