اسلام آباد: پاکستان تحریک انصاف کے سابق سیکرٹری اطلاعات احمد جواد نے عمران خان اور ان کی حکومت پر شدید تنقید کی ہے۔
نجی نیوز چینل سے گفتگو کرتے ہوئے سابق پی ٹی آئی رہنما احمد جواد نے کہا کہ پی ٹی آئی تبدیلی کے نظریے پر شروع ہوا گندا دھوکا ہے، عمران خان کو حقائق بتانے والوں کی ضرورت ہے، وہ درباریوں کے گھیرے میں ہیں۔
احمد جواد نے کہا کہ میں نے سچ کا ساتھ دیا اور سچ کے لیے کھڑا ہوا ہوں، سچ کی طاقت بہت زیادہ ہے، آوازیں معاشرے، نسل اور قوم کا عکس ہوتی ہیں، پوری دنیا سے لاکھوں کی تعداد میں مجھے فون کالز موصول ہو رہی ہیں۔
انہوں نے کہا کہ جس کی ٹیم گدھوں پر مشتمل ہو ایسا لیڈر معاشرے کو تباہ کرسکتا ہے، پی ٹی آئی کا ورکر عمران خان کا اصل چہرہ پہچان چکا ہے، اب ہم اس حکمران کو بے نقاب کریں گے، مجھ سمیت بہت سے کارکن دھوکے کا شکار ہوئے۔
جس لیڈر کی ٹیم بھونکنے والے کتوں، کائیں کائیں کرنیوالے کووؤں،ٹر ٹر کرنیوالے ڈھڈوؤں،سکھاۓ گئے رٹے رٹاۓ فقرے دوھرانے والے طوطوں،سر جھکا کر وزن اُٹھانے والے گدھوں پر مشتمل ہو، ایسا لیڈر کسی بھی معاشرے کو تباہ کر سکتا ہے۔ آوازیں معاشرے،نسل اور قسم کا عکس ہوتی ہیں۔
— Ahmad Jawad PTI (@AhmadJawadBTH) January 23, 2022
سابق پی ٹی آئی رہنما نے یہ بھی کہا کہ عمران خان کے دورِ حکومت میں کون کون ارب پتی بنا سب کے نام سامنے لاؤں گا، اس پر کام شروع کردیا، ڈیٹا اکٹھا کر رہا ہوں، صحافیوں سے بھی مدد لوں گا اور انہیں اہم تفصیلات فراہم کروں گا۔
احمد جواد نے کہا کہ عمران خان صرف اپنی تعریف سننے والوں کو پسند کرتے ہیں، عمران خان نے اوور سیز پاکستانیوں کو اپنا اے ٹیم ایم بنا لیا ہے۔
