اسلام آباد(صباح نیوز)صدر مملکت ڈاکٹر عارف علوی نے کہا ہے کہ آرٹس اینڈ کرافٹس ولیج کے احیاسے ملکی ثقافتی ورثے کے فروغ میں مدد ملے گی، ولیج کی بحالی سے دستکاروں اور کاریگروں کو مقامی فنون اور ثقافتی مصنوعات کوفروغ دینے کا موقع ملے گا۔ جمعرات کو ایوانِ صدر کے پریس ونگ سے جاری بیان کے مطابق ان خیالات کا اظہار انہوں نے یہاں آرٹس اینڈ کرافٹس ولیج شکرپڑیاں کے احیا پر منعقدہ اجلاس کے دوران کیا۔ صدر مملکت نے کہا کہ ولیج دستکاروں، کاریگروں، باہنر نوجوانوں کو مصنوعات کی نمائش اور مارکیٹنگ کے لیے پلیٹ فارم مہیا کرے گا جبکہ آرٹس اینڈ کرافٹس ولیج قومی و بین الاقوامی کاریگروں میں روابط ، ثقافتی تعلقات بڑھانے میں مدد دے گا۔ صدر مملکت کی زیر صدارت اجلاس میں چیئرمین سی ڈی اے، نیشنل کالج آف آرٹس اور پاکستان انسٹی ٹیوٹ آف فیشن اینڈ ڈیزائن کے وائس چانسلرز سمیت دیگر متعلقہ حکام نے شرکت کی۔ چیئرمین سی ڈی اے عامر علی احمد نے گائوں کی بحالی کے منصوبے پر بریفنگ دی۔