مقبوضہ بیت المقدس (انٹرنیشنل ڈیسک) اسرائیلی فوج نے دعویٰ کیا ہے کہ اس نے لبنان کی سرحد پر اسلحہ اسمگل کرنے کی کوشش ناکام بناتے ہوئے 3مشتبہ افراد کو حراست میں لے لیا ہے۔ اسرائیلی فوج کے ترجمان افیحائی ادرعی نے ٹوئٹر پر اپنے ایک بیان میں کہا کہ مشتبہ ملزمان کو لبنان اور فلسطین کی سرحد سے گرفتار کیا گیا۔ یہ گرفتاری غجر گاؤں کی گئی اور ملزمان کو سرحدی علاقے میں اسلحہ سے بھرا بیگ چھپانے کی کوشش کرتے پکڑا گیا۔ اسرائیلی ملٹری پولیس کا کہنا ہے کہ گرفتار ملزمان سے مختلف اقسام کی رائفل کی گولیاں قبضے میں لی گئی ہیں۔ اسرائیلی فوج نے گرفتار ملزمان کی شناخت ظاہرنہیں کی ہے۔
