کیا آپ جانتے ہیں وزیراعظم کس زبان میں بات کر رہے ہیں؟ ویڈیو سوشل میڈیا پر وائرل

وزیراعظم شہباز شریف اپنی خداداد صلاحیتیوں سے ہمیشہ دوسروں کو حیران کرتے رہتے ہیں۔ ان کی انتھک محنت کا ہر کوئی قائل ہے۔ وہ بغیر تھکے گھنٹوں کام کرنے کے عادی ہیں۔ لیکن حال ہی میں ان کی ایک اور صلاحیت پاکستانی عوام پر آشکار ہو رہی ہے اور وہ ہے دنیا کی مختلف زبانوں پر عبور ہونا۔

پاکستانی وزیراعظم کی مادری زبان پنجابی ہے لیکن وہ انگریزی، عربی، فارسی، ترکی سندھی، بلوچی، پشتو، سرائیکی سمیت کئی مقامی زبانوں کے علاوہ دیگر ممالک کی زبانیں بھی روانی سے بول لیتے ہیں۔

Prime Minister Shehbaz Sharif spoke to German tourists during his trip to Swat. Prime Minister has assured stranded individuals will be provided all amenities on priority basis. #HelpThemRise pic.twitter.com/XajPKbTGGq

— Government of Pakistan (@GovtofPakistan) August 31, 2022

وزیراعظم شہباز شریف نے اس کا مظاہرہ حال ہی میں خیبر پختونخوا میں سیلاب سے متاثرہ علاقے سوات کے دورے کے موقع پر کیا۔ دورہ سوات کے دوران شہباز شریف کی پاکستانی نژاد جرمن سیاحوں سے بھی ملاقات ہوئی جن میں خواتین، مرد اور بچے شامل تھے۔

اس ملاقات کے دوران وزیراعظم نے سیاحوں کو دلاسہ دیا کہ حکومت اور پاک فوج اس مشکل گھڑی میں ان کیساتھ کھڑی ہے اور قوم کو کبھی ریلیف کے کاموں میں تنہا نہیں چھوڑے گی اور ان کی مکمل بہبود تک چین سے نہیں بیٹھیں گے۔

اس موقع پر وزیراعظم نے سیاحوں سے پوچھا کہ ان کا تعلق کہاں سے ہے تو انہوں نے بتایا کہ ہم بنیادی طور پر ساہیوال سے ہیں لیکن ہمارے پاس جرمن شہریت ہے۔ یہ سنتے ہی شہباز شریف نے وہاں موجود بچوں اور خواتین کیساتھ روانی کیساتھ جرمن زبان میں بات شروع کردی۔

وزیراعظم شہباز شریف کو جرمن زبان میں گفتگو کرتا دیکھ کر وہاں موجود لوگ بھی دنگ رہ گئے۔ یہ ویڈیو سوشل میڈیا پر وائرل ہو چکی ہے۔ لوگ اس پر دلچسپ تبصرے کر رہے ہیں۔