کراچی: سندھ پولیس نے گلبہار میں کارروائی کرتے ہوئے شادی کی تقریب میں ہوائی فائرنگ کرنے والے نوجوان کو دھر لیا۔
ایکسپریس نیوز کے مطابق گلبہار کے علاقے ناظم آباد 2 نمبر میں شادی کی تقریب میں ہوائی فائرنگ کرنے والے 2 افراد کو پولیس نے گرفتار کر کے مقدمہ درج کرلیا۔
شادی کی خوشی میں کی جانے والی فائرنگ کی ویڈیو سوشل میڈیا پر وائرل ہوئی تھی جس میں دیکھا جس سکتا ہے کہ فائرنگ کرنے والے چھوٹے اور بڑے ہتھیار سے ہوائی فائرنگ کر رہے ہیں۔
ویڈیو سوشل میڈیا پر وائرل ہونے کے بعد ایس ایس پی سینٹرل رانا معروف عثمان نے فوری طور پر واقعہ میں ملوث افراد کے خلاف قانونی کارروائی کی ہدایت دی جس پر پولیس نے معلومات حاصل کر کے فائرنگ کرنے والے 2 افراد یوسف خان اور خضر اللہ کو گرفتار کر کے اسلحہ برآمد کرتے ہوئے ان کے خلاف مقدمہ بھی درج کرلیا۔