چیف ٹریفک آفیسر لاہور (سی ٹی او) کیپٹن (ر) مستنصر فیروز نے ٹریفک قوانین کی پابندی کے لیے سخت کریک ڈاؤن کا حکم دے دیا۔ یکم مئی سے بغیر لائسنس گاڑی چلانے پر ڈرائیورز کو دو ہزار روپے جرمانہ ادا کرنا ہوگا۔
سی ٹی او لاہور مستنصر فیروز نے کہا ہے کہ سوموار سے بغیر لائسنس گاڑی، موٹرسائیکل چلانے والوں کےخلاف بھرپور کریک ڈاؤن ہوگا۔ دو روز تک ایجوکیشن یونٹ اور سرکل افسران کو آگاہی دینے کا حکم دے دیا ہے۔لائسنس نہ ہونے پر ڈرائیورز کو 2 ہزار روپے جرمانہ ہوگا۔لائسنس چیکنگ کےلئے 17 خصوصی ٹیمیں بھی تعینات کی جائیں گی۔
مستنصر فیروز کا کہنا تھا کہ لاہور میں رجسٹرڈ گاڑی، موٹرسائیکلوں کی تعداد 75 لاکھ کے قریب ہےجبکہ ڈرائیونگ لائسنس صرف 09 لاکھ کے قریب شہریوں کے پاس ہے۔شہریوں کی سہولت اور آسانی کےلئے لائسنسنگ دفاتر کے اوقات بڑھا دئیے گئے ہیں۔ لبرٹی لائسنس سینٹر 24/7 جبکہ مناواں سینٹر اور ارفعہ کریم صبح 08 بجے سے رات 12 بجے تک کھلے ہیں، گریٹر اقبال پارک، ڈیفنس سینٹر اور بحریہ ٹاؤن بھی رات 12 بجے تک کھلےہیں۔
سی ٹی او لاہور نے مزید کہا کہ لرنر پرمٹ ہولڈرز گاڑی کے آگے اور پیچھے سکرین پر سائن چسپاں کریں۔ کمرشل، مال بردار اور پبلک سروس وہیکلز کے ڈرائیورز کے پاس ویلڈ لائسنس ہونا چاہیے۔ حادثات کی بڑی وجہ ڈرائیورز کے پاس ڈرائیونگ لائسنس کا نہ ہونا بھی ہے۔ سخت کریک ڈاؤن سے حادثات میں کمی آئے گی۔ انسانی جانوں کو بچانے کیلئے کریک ڈاؤن جاری رہے گا۔ڈرائیورز کے پاس لائسنس کا ہونا خود اعتماد ڈرائیونگ کی علامت ہے۔
