امریکہ کی ریاست پینسلوانیا میں ‘خطرناک مادّوں’ سے لدی مال گاڑی کی 16 بوگیاں پٹڑی سے اتر گئی ہیں۔
سی این این کی خبر کے مطابق مال گاڑی کی مالک سی ایس ایکس ریلوے لائن کمپنی نے جاری کردہ تحریری بیان میں کہا ہے کہ حادثہ فلیڈلفیا کے علاقے پلے ماوتھ میٹنگ میں پیش آیا ہے۔
بیان کے مطابق ٹرین کی 40 بوگیوں میں سے 16 پٹڑی سے اتر گئی ہیں۔ ابتدائی تحقیقی رپورٹوں کے مطابق بوگیوں میں سے ایک خطرناک مادّوں سے لدی ہوئی تھی اور ان مادّوں کے رسنے یا بہنے کے بارے میں تاحال کوئی ثبوت موجود نہیں ہے۔
مزید کہا گیا ہے کہ ریل گاڑی کے عملے کو کوئی نقصان نہیں پہنچا اور واقعے کی تحقیقات شروع کروا دی گئی ہیں۔
پولیس نے جاری کردہ بیان میں کہا ہے کہ واقعے کے بعد بوگی سے خطرناک مادّے کے اخراج کے مقابل بطور حفاظتی تدبیر کے اطراف کے رہائشی مکانات کو خالی کروا لیا گیا ہے۔
واضح رہے کہ 3 فروری کو بھی ریاست اوہائیو کے قصبے مشرقی فلسطین کے جوار میں زہریلے مادوں سے لدی ‘نورفولک ساوتھرن’ کمپنی کی 150 بوگیوں والی ریل گاڑی کی 50 بوگیاں پٹڑی سے اتر گئی تھیں ۔ حادثے کے بعد زہریلے مادّے اطراف میں پھیل کر ایک ماحولیاتی تباہی کا سبب بن گئے تھے۔ بھاری مقدار میں زہریلے کیمیائی مادوں کی وجہ سے علاقے کے رہائشیوں کی محفوظ مقامات پر منتقلی کا فیصلہ کیا گیا تھا۔
حادثے سے 3 دن بعد علاقے میں واپس لوٹنے والے رہائشیوں کو سر درد، آنکھوں میں جلن، کھانسی اور تھکن جیسے صحت کے مسائل کا سامنا کرنا پڑا تھا۔ علاوہ ازیں ذرائع ابلاغ نے متاثرہ علاقے میں حیوانات کی اموات سے متعلق خبریں بھی شائع کی تھیں۔