پاکستان نے اقوام متحدہ سے تنازعات والے علاقوں میں اپنے فرائض سرانجام دینے والے امن دستوں کی "مکمل سیکورٹی” کا مطالبہ کیا ہے ۔
حکومتِ پاکستان کے عبوری وزیر خارجہ جلیل عباس جیلانی نے اقوام متحدہ کی امن فوج میں سرا انجام دینے والے افراد کی ہلاکتوں میں اضافے پر توجہ مبذول کروائی ہے۔
دارالحکومت اسلام آباد میں یو این پیس کیپنگ فورس کے تحفظ اور سلامتی سے متعلق وزارتی سطح پر منعقدہ سالانہ تیاری کے اجلاس سے خطاب کرتے ہوئے جیلانی نے کہا کہ ہمیں ایسے افراد یا گروہوں کو جوابدہ ٹھہرانے میں سمجھوتہ نہیں کرنا چاہیے جو اقوام متحدہ کے امن عمل (عناصر) کو نقصان پہنچاتے ہیں یا ان کو دھمکی دیتے ہیں۔
جیلانی نے اس بات پر زور دیا کہ اقوام متحدہ کے تمام رکن ممالک اقوام متحدہ کی امن فوج کے عناصر کی سلامتی کو یقینی بنانے کے لیے پرعزم ہیں۔
انہوں نے کہا کہ ہاتھ سے تیار دھماکہ خیز مواد خاص طور پر امن مشنز کے لیے ایک سنگین خطرہ ہے، جیلانی نے تجویز پیش کی کہ اقوام متحدہ کے رکن ممالک اپنے مشن سے پہلے کی ٹریننگ مزید بہتر بنائیں ۔
انہوں نے کہا کہ پاکستان کو اقوام متحدہ کے امن مشن میں 4000 سے زائد فوجیوں کا حصہ دینے پر فخر ہے جو کہ مسلسل فعال ہیں، جیلانی نے کہا کہ ڈیوٹی کے دوران 172 شہید ہوئے ہیں۔