ہانگ کانگ: رہائشی عمارت میں آگ لگنے کے نتیجے میں 5 افراد ہلاک اور 35 زخمی ہو گئے۔
بین الاقوامی خبر رساں اداروں کے مطابق ہانگ کانگ کے ضلع کوولون میں ایک بلند رہائشی عمارت میں آگ لگ گئی، جس میں جھلس کر پانچ افراد ہلاک اور 35 زخمی ہو گئے، جنہیں ریسکیو کرکے اسپتال منتقل کیا گیا۔
ابتدائی اطلاعات کے مطابق آگ سے متاثر ہونے والی عمارت 16 منزلوں پر مشتمل ہے، جس میں پھنسے ہوئے افراد مدد کے لیے پکار رہے تھے۔ عمارت میں بنے جم میں لگنے والی آگ پھیل کر دوسری منزلوں پر پہنچی ،جس کی اطلاع ملتے ہی ریسکیو اداروں کی ٹیموں نے پہنچ کر امدادی کارروائی کی۔
ریسکیو حکام کے مطابق عمارت میں پھنسے ہوئے ڈیڑھ سو سے زیادہ افراد کو نکال کر محفوظ مقام پر منتقل کیا گیا جب کہ 40 کو اسپتال منتقل کیا گیا، جن میں سے 5 افراد ہلاک ہو گئے۔