لاہور:پاکستان پیپلز پارٹی (پی پی پی) کے رہنما حسن مرتضیٰ نے کہا ہے کہ ان کی پارٹی اقتدار میں کوئی حصہ نہیں چاہتی۔
ان خیالات کا اظہار انہوں نےگورنر ہاؤس میں پاکستان مسلم لیگ (ن) اور پیپلز پارٹی کی مشترکہ کمیٹی کے اجلاس کے اختتام کے بعد کیا۔
ملاقات میں دونوں جماعتوں کے رہنماؤں نے شرکت کی۔ اسحاق ڈار اور راجہ پرویز اشرف نے اجلاس کی مشترکہ صدارت کی جبکہ مسلم لیگ ن کی جانب سے رانا ثناء اللہ، مریم اورنگزیب، اعظم نذیر تارڑ اور ملک احمد خان نے شرکت کی۔
پیپلز پارٹی کی جانب سے راجہ پرویز اشرف اور حسن مرتضیٰ نے اجلاس میں شرکت کی جب کہ گورنر پنجاب سردار سلیم حیدر خان، ندیم افضل چن اور علی حیدر گیلانی ویڈیو لنک کے ذریعے شریک ہوئے۔ اجلاس میں پاور شیئرنگ کے وعدوں پر پیش رفت کا جائزہ لیا گیا۔
ملاقات کے بعد حسن مرتضیٰ نے میڈیا کو بتایا کہ بات چیت تعمیری رہی اور مثبت پیش رفت ہوئی۔ انہوں نے واضح کیا کہ پیپلز پارٹی اقتدار میں حصہ نہیں چاہتی۔
پیپلز پارٹی کی توجہ مہنگائی اور لاقانونیت کو کم کرنے پر ہے۔ ان مسائل کے حل کے لیے ایک ذیلی کمیٹی تشکیل دی گئی ہے۔ یہ سمجھنا درست نہیں ہے کہ وہ حکومت کو ٹف ٹائم دینے کا ارادہ رکھتے ہیں، کیونکہ ذیلی کمیٹی ایک ہفتے کے اندر سفارشات فراہم کرے گی، اور کسی بھی طرف سے کوئی سیاسی بیان بازی نہیں ہو گی۔