نیشنل سیکیورٹی ورکشاپ بلوچستان کے وفد نے پشاور کا دورہ کیا جہاں وفد نے گورنر خیبرپختونخوا اور کور کمانڈر پشاور سے ملاقاتیں کیں۔ دورے کا مقصد قومی سلامتی، امن و امان اور علاقائی امور پر تبادلۂ خیال کرنا تھا۔
تفصیلات کے مطابق وفد نے یادگارِ شہداء پر حاضری دی اور شہداء کے ایصالِ ثواب کے لیے فاتحہ خوانی کی۔ اس موقع پر شرکاء نے مادرِ وطن کے لیے جانوں کا نذرانہ پیش کرنے والے شہداء کو خراجِ عقیدت پیش کیا اور ان کی قربانیوں کو سلام پیش کیا۔
نیشنل سیکیورٹی ورکشاپ کے شرکاء نے کور کمانڈر پشاور سے بھی ملاقات کی، جہاں کور کمانڈر نے شرکاء کے سوالات کے جامع اور مفصل جوابات دیے۔ شرکاء کو صوبے میں امن و امان کی صورتحال، انسدادِ دہشتگردی اقدامات اور بارڈر مینجمنٹ سے متعلق مؤثر حکمتِ عملی سے آگاہ کیا گیا۔
بعد ازاں وفد نے گورنر ہاؤس پشاور کا دورہ کیا جہاں گورنر خیبرپختونخوا سے مختلف قومی اور علاقائی امور پر تفصیلی گفتگو ہوئی۔ اس کے علاوہ شرکاء نے قلعہ بالا حصار میوزیم کا بھی دورہ کیا جہاں انہیں تاریخی اور ثقافتی ورثے سے متعلق بریفنگ دی گئی۔
نیشنل سیکیورٹی ورکشاپ بلوچستان کے شرکاء کا کہنا تھا کہ افواجِ پاکستان اور فرنٹیئر کور ملک کی محافظ اور قومی سالمیت و ترقی کی ضامن ہیں۔ شرکاء کے مطابق کور کمانڈر پشاور کے ساتھ سیشن میں بارڈر مینجمنٹ کے حقیقی مسائل اور درپیش چیلنجز سے متعلق بھرپور آگاہی حاصل ہوئی۔
