واشنگٹن: امریکی صدر ڈونلڈ ٹرمپ نے ایک بار پھر عالمی سیاست میں ہلچل مچا دینے والا بیان دیتے ہوئے کہا ہے کہ امریکا کو گرین لینڈ کا مالک ہونا چاہیے تاکہ روس یا چین اس خطے پر قبضہ نہ کر سکیں۔
وائٹ ہاؤس میں صحافیوں سے گفتگو کرتے ہوئے صدر ٹرمپ نے کہا کہ امریکا کسی صورت یہ برداشت نہیں کر سکتا کہ روس یا چین جیسی بڑی طاقتیں گرین لینڈ تک رسائی حاصل کریں، کیونکہ اس صورت میں وہ امریکا کے براہِ راست ہمسایے بن جائیں گے، جو ناقابلِ قبول ہے۔
صدر ٹرمپ کا کہنا تھا کہ گرین لینڈ ایک نہایت اسٹریٹجک خطہ ہے اور اگر امریکا نے اس پر اپنی گرفت مضبوط نہ کی تو روس یا چین اس خلا کو پر کر سکتے ہیں۔ انہوں نے کہا کہ وہ چینی اور روسی عوام سے ذاتی طور پر محبت رکھتے ہیں، تاہم قومی سلامتی کے معاملات میں جذبات کو جگہ نہیں دی جا سکتی۔ اسی لیے امریکا کو اپنی سرحدوں اور اسٹریٹجک مفادات کے تحفظ کے لیے سخت فیصلے کرنا پڑتے ہیں۔
ٹرمپ نے واضح کیا کہ اس وقت گرین لینڈ کے مالی معاملات یا کسی ممکنہ خریداری کی رقم پر کوئی بات نہیں ہو رہی۔ ان تمام پہلوؤں پر بعد میں غور کیا جائے گا، فی الحال اصل مسئلہ یہ ہے کہ امریکا اپنے مستقبل کے ممکنہ خطرات کو روکے۔ اگر امریکا نے بروقت اقدام نہ کیا تو عالمی طاقتوں کا اثر و رسوخ اس حد تک بڑھ سکتا ہے جو واشنگٹن کے لیے خطرناک ہو۔
اسی دوران وائٹ ہاؤس میں امریکی آئل کمپنیوں کے اعلیٰ حکام سے ملاقات کے دوران صدر ٹرمپ نے وینزویلا کے حوالے سے بھی اہم انکشافات کیے۔ انہوں نے کہا کہ امریکا وینزویلا میں 100 ارب ڈالر تک کی سرمایہ کاری پر غور کر رہا ہے اور یہ کہ امریکا اور وینزویلا مل کر دنیا کے 55 فیصد تیل کے ذخائر کے مالک ہیں۔ صدر ٹرمپ کے مطابق امریکا نے گزشتہ روز وینزویلا سے 3 کروڑ بیرل تیل حاصل کیا ہے۔
امریکی صدر نے اس موقع پر کہا کہ چین اور روس امریکا سے وینزویلا کا تیل خرید سکتے ہیں، تاہم یہ تمام معاہدے امریکا کے کنٹرول میں ہوں گے۔ اگر امریکا نے وینزویلا میں مداخلت نہ کی ہوتی تو وہاں بھی روس یا چین اپنی جگہ بنا چکے ہوتے۔ ٹرمپ کے مطابق امریکا اور وینزویلا کے تعلقات درست سمت میں جا رہے ہیں اور اس تعاون سے براہِ راست فائدہ امریکی عوام کو پہنچے گا۔
بین الاقوامی مبصرین کے مطابق صدر ٹرمپ کے یہ بیانات اس بات کی عکاسی کرتے ہیں کہ امریکا آنے والے دنوں میں نہ صرف توانائی کے شعبے بلکہ اسٹریٹجک خطوں میں بھی اپنی گرفت مضبوط کرنا چاہتا ہے۔ گرین لینڈ اور وینزویلا سے متعلق بیانات کو عالمی طاقتوں کے درمیان بڑھتی ہوئی مسابقت کے تناظر میں دیکھا جا رہا ہے، جس کے اثرات مستقبل کی عالمی سیاست پر گہرے ہو سکتے ہیں۔