اسلام آباد: وفاقی دارالحکومت اسلام آباد کی ضلعی انتظامیہ نے شہر میں سیکیورٹی سخت کرنے اور جرائم کی روک تھام کے لیے موٹر سائیکلوں پر بھی ایم ٹیگ لازمی قرار دینے کا فیصلہ کر لیا ہے، جس کے تحت شہری چند منٹ میں اپنی بائیکس پر جدید شناختی ٹیگ لگوا سکیں گے۔
ضلعی انتظامیہ کے مطابق شہر بھر میں قائم تیرہ مخصوص مراکز پر موٹر سائیکل ایم ٹیگ سروس شروع کر دی گئی ہے جہاں شہری اپنی موٹر سائیکل، ملکیتی کاغذات اور شناختی کارڈ کے ہمراہ پہنچ کر صرف پانچ منٹ میں ٹیگ حاصل کر سکتے ہیں، اس نظام کا مقصد موٹر سائیکلوں کی درست شناخت، چوری شدہ گاڑیوں کی فوری نشاندہی اور جرائم پیشہ عناصر کی نقل و حرکت پر نظر رکھنا ہے۔
ڈپٹی کمشنر اسلام آباد نے سماجی رابطے کے پلیٹ فارم ایکس پر جاری پیغام میں شہریوں کو ہدایت کی کہ وہ جلد از جلد اپنی بائیکس رجسٹر کروا کر ایم ٹیگ لگوائیں تاکہ آئندہ کسی بھی قانونی پیچیدگی سے بچا جا سکے، بغیر ایم ٹیگ موٹر سائیکل چلانے والوں کے خلاف قانون کے مطابق کارروائی کی جائے گی جس میں جرمانے اور ممکنہ طور پر گاڑی ضبطی بھی شامل ہو سکتی ہے۔
انتظامیہ کے مطابق یہ اقدام جدید شہری سیکیورٹی نظام کا حصہ ہے جس کے ذریعے مشکوک گاڑیوں کی نگرانی، ٹریفک نظم و ضبط اور جرائم کی روک تھام میں مدد ملے گی، بڑے شہروں میں اس نوعیت کے ڈیجیٹل ٹیگنگ نظام پہلے ہی مؤثر ثابت ہو چکے ہیں اور دارالحکومت میں اس کا نفاذ شہری تحفظ کو مزید مضبوط بنائے گا۔
شہریوں نے اس فیصلے پر ملا جلا ردِعمل ظاہر کیا ہے۔ کچھ افراد نے اسے سیکیورٹی کے لیے مثبت قدم قرار دیا ہے جبکہ بعض نے سہولت مراکز کی تعداد بڑھانے اور آگاہی مہم چلانے کا مطالبہ کیا ہے تاکہ عوام کو طریقہ کار سے مکمل طور پر آگاہ کیا جا سکے۔
ضلعی انتظامیہ نے عوام سے اپیل کی ہے کہ وہ قانون کی پاسداری کرتے ہوئے اس اقدام میں تعاون کریں اور مقررہ مراکز سے بروقت ایم ٹیگ حاصل کریں تاکہ شہر میں امن و امان کے قیام اور جرائم کے خاتمے میں اجتماعی کردار ادا کیا جا سکے۔
