اسلام آباد : نائب وزیراعظم و وزیر خارجہ اسحاق ڈار کل سعودی عرب کے دورے پر روانہ ہوں گے جہاں وہ 28 فروری تک قیام کریں گے۔ ترجمان دفتر خارجہ کے مطابق اسحاق ڈار اسلامی تعاون تنظیم کی مجلس عاملہ کے غیر معمولی وزارتی اجلاس میں شرکت کریں گے۔
یہ اجلاس اسرائیلی آبادکاری، الحاق اور مغربی کنارے میں کیے جانے والے غیر قانونی اقدامات کے تناظر میں طلب کیا گیا ہے۔ پاکستان اس فورم پر مقبوضہ مغربی کنارے کی صورتحال سے متعلق اپنا مؤقف پیش کرے گا۔
ترجمان کے مطابق اسحاق ڈار کی مختلف ممالک کے وزرائے خارجہ سے دو طرفہ ملاقاتیں بھی متوقع ہیں، جن میں باہمی تعاون اور خطے کی صورتحال پر تبادلہ خیال کیا جائے گا۔ اسحاق ڈار مقدس شہروں کا مختصر دورہ بھی کریں گے۔
