مشرق وسطیٰ کی کشیدہ صورت حال اور ایران جنگ بندی کے حوالے سے پاکستان کی میزبانی میں چار فریقی اجلاس میں شرکت کیلیے مصر اور ترکیہ کے وزیرخارجہ اسلام آباد پہنچ گئے۔
تفصیلات کے مطابق مصر کے وزیر خارجہ ڈاکٹر بدر چار ملکی وزرائے خارجہ کانفرنس میں نائب وزیراعظم اور پاکستانی ہم منصب کی دعوت پر اسلام آباد پہنچے۔
اسلام آباد ایئرپورٹ پر مصر کے وزیر خارجہ کا پرتپاک استقبال کیا گیا۔
بعد ازاں ترکیہ کے وزیرخارجہ حکان فدان چار فریقی اجلاس میں شرکت کیلیے اسلام آباد پہنچے۔ پاکستان آمد پر ایڈیشنل فارن سیکرٹری افغانستان اور مغربی ایشیا سید علی اسد گیلانی نے ان کا استقبال کیا۔
اسلام آباد میں اہم سفارتی اجلاس، سعودی عرب، ترکیہ اور مصرکے وزرائے خارجہ شرکت کریں گے
ایران کی صورت حال پر نائب وزیر اعظم و وزیر خارجہ اسحاق ڈار کی دعوت پر خطے کی موجودہ صورتحال پر 29 اور 30 مارچ کو اسلام آباد چار فریقی وزرائے خارجہ کا اجلاس ہوگا۔
پاکستان کی میزبانی میں ہونے والی کانفرنس میں سعودی عرب، ترکیہ کے وزرائے خارجہ بھی شریک ہوں گے۔
ذرائع کے مطابق اجلاس میں خطے کی سیکیورٹی صورتحال، مشرقِ وسطیٰ کی کشیدگی اور باہمی تعاون کے امور پر تفصیلی غور کیا جائے گا۔ اہم سفارتی مشاورت میں علاقائی استحکام، امن کے فروغ اور مشترکہ حکمت عملی پر تبادلہ خیال متوقع ہے۔
سفارتی حلقوں کا کہنا ہے کہ یہ اجلاس موجودہ علاقائی تناؤ کے تناظر میں نہایت اہمیت کا حامل ہے اور اس سے خطے میں امن و استحکام کے لیے مشترکہ لائحہ عمل سامنے آنے کی توقع ہے۔