امریکا میں سکیورٹی حلقوں سے وابستہ ایک اہم شخصیت نے ایران کے حوالے سے ممکنہ فوجی حکمتِ عملی پر تشویش کا اظہار کرتے ہوئے عوام سے براہِ راست مداخلت کی اپیل کر دی ہے۔
غیر ملکی ذرائع ابلاغ کی رپورٹس کے مطابق امریکی انسدادِ دہشتگردی مرکز کے سابق ڈائریکٹر جو کینٹ نے اپنے بیان میں خبردار کیا کہ ایران میں زمینی فوجی کارروائی کے نتائج نہایت سنگین ہو سکتے ہیں، اس لیے اس فیصلے کو ہر صورت روکنا ناگزیر ہے۔
اپنے پیغام میں انہوں نے امریکی عوام پر زور دیا کہ وہ وائٹ ہاؤس اور کانگریس کے نمائندوں سے فوری رابطہ کریں اور ایران میں بری افواج بھیجنے کے کسی بھی اقدام کی مخالفت کریں۔
ان کا کہنا تھا کہ عوامی دباؤ ہی اس ممکنہ فیصلے کو تبدیل کروا سکتا ہے، اسی مقصد کے تحت انہوں نے متعلقہ اداروں کے رابطہ نمبرز بھی جاری کیے تاکہ شہری براہِ راست اپنی آواز حکام تک پہنچا سکیں۔
جو کینٹ نے اپنے بیان میں خطے کی موجودہ صورتحال کا حوالہ دیتے ہوئے کہا کہ مصر کے صدر عبدالفتح السیسی کا بھی یہی مؤقف سامنے آیا ہے کہ خلیجی خطے میں جاری کشیدگی کو ختم کرنے میں امریکی صدر ڈونلڈ ٹرمپ کلیدی کردار ادا کر سکتے ہیں، موجودہ حالات میں سفارتی کوششوں کو ترجیح دینا وقت کی اہم ضرورت ہے۔
سابق ڈائریکٹر نے مزید کہا کہ ایران میں زمینی کارروائی نہ صرف خطے کو ایک وسیع تر جنگ کی جانب دھکیل سکتی ہے بلکہ اس کے عالمی اثرات بھی مرتب ہوں گے، اس مرحلے پر عسکری مداخلت کے بجائے سیاسی اور سفارتی راستوں کو اختیار کرنا ہی دانشمندانہ حکمتِ عملی ہو سکتی ہے، تاکہ صورتحال کو مزید بگڑنے سے روکا جا سکے۔
یاد رہے کہ 28 فروری کو اسرائیل اور امریکا کی جانب سے ایران پر مشترکہ حملوں کا آغاز کیا گیا تھا، جس کے نتیجے میں ایران کے سپریم لیڈر آیت اللہ خامنہ ای اور پاسداران انقلاب کے اعلیٰ کمانڈرز سمیت دو ہزار سے زائد شہری جاں بحق ہو چکے ہیں، جن میں بچوں کی ایک بڑی تعداد بھی شامل ہے۔ ان حملوں کے ردعمل میں ایران نے امریکا اور اسرائیل کو نشانہ بناتے ہوئے اسرائیل پر براہ راست حملے کیے جبکہ خلیجی ممالک میں قائم امریکی فوجی اڈوں پر بھی ڈرون اور میزائل کارروائیاں شروع کر دی ہیں۔