اسلام آباد: وفاقی حکومت نے سولر سسٹم استعمال کرنے والے صارفین کے لیے بلنگ کے نظام میں بڑی تبدیلیاں متعارف کرا دی ہیں، جس کے تحت اب اضافی بجلی پیدا کرنے پر ملنے والا مالی ریلیف مکمل طور پر ختم کر دیا گیا ہے۔
بجلی کی تقسیم کار کمپنیوں نے نئے احکامات کی روشنی میں اضافی بجلی کو صفر یونٹ قرار دے دیا ہے۔ اس اقدام کے بعد ان صارفین کے کنکشنز پر ایکسپورٹ ایم ڈی آئی چیک کا نفاذ شروع کر دیا گیا ہے جو معاہدے کی خلاف ورزی کے مرتکب ہوئے ہیں۔
حکومت کی جانب سے جاری کردہ نئے طریقہ کار کے مطابق اب اگر کوئی صارف اپنے منظور شدہ جنریشن لائسنس کی حد سے زیادہ پینلز نصب کرتا ہے تو اسے ملنے والی رعایت ختم ہو جائے گی۔ اضافی بجلی سسٹم میں تو شامل ہوگی لیکن اس کا کوئی معاوضہ نہیں ملے گا۔
اس فیصلے سے ان صارفین پر گہرا اثر پڑے گا جنہوں نے اپنی ضرورت سے زیادہ سولر پینلز لگا رکھے تھے۔ نیٹ میٹرنگ پالیسی کے تحت حاصل ہونے والا یہ ریلیف اب ایکسپورٹ ایم ڈی آئی ریڈنگ کی بنیاد پر بند کر دیا گیا ہے، جس سے صارفین کے اخراجات میں اضافہ متوقع ہے۔
ماہرین کا کہنا ہے کہ یہ تبدیلی توانائی کے شعبے میں ریگولیٹری اصلاحات کا حصہ ہے۔ حکومت کا موقف ہے کہ اس اقدام سے گرڈ سسٹم پر بوجھ کو کنٹرول کیا جا سکے گا، تاہم صارفین اسے اپنے کیے گئے سرمایہ کاری کے معاہدوں کی صریح خلاف ورزی قرار دے رہے ہیں۔
سولر پینلز کے ذریعے بجلی پیدا کرنے والے ہزاروں صارفین اب اس نئی پالیسی کے اثرات سے پریشان ہیں۔ حکومت نے واضح کیا ہے کہ لائسنس سے تجاوز کرنے والے کسی بھی صارف کو اضافی جنریشن پر کوئی رعایت نہیں دی جائے گی، چاہے وہ بجلی گرڈ میں کتنی ہی کیوں نہ بھیجی جائے۔