پنجاب شدید اسموگ کی لپیٹ میں، بارش سے بھی کوئی خاص فرق نہ پڑا

 پاکستان کے بیشتر میدانی علاقوں میں فضائی آلودگی اور اسموگ کی صورتحال انتہائی تشویشناک ہو گئی ہے جہاں ہوا کا معیار انسانی صحت کے لیے انتہائی مضر حد تک گر چکا ہے۔ عالمی مانیٹرنگ اداروں کے تازہ ترین اعداد و شمار کے مطابق رواں ہفتے پاکستان کے کئی بڑے شہر دنیا کے آلودہ ترین شہروں کی فہرست میں سرفہرست رہے ہیں جس سے شہریوں میں سانس اور آنکھوں کی بیماریاں تیزی سے پھیل رہی ہیں۔
محکمہ موسمیات کے مطابق حالیہ بارش برسانے والا سسٹم صرف بالائی خیبر پختونخوا، خطہ پوٹھوہار، کشمیر اور گلگت بلتستان تک محدود رہا ہے جبکہ ملک کے بیشتر میدانی علاقے بدستور خشک ہیں۔ بالائی علاقوں میں ہلکی بوندا باندی اور ہواؤں کے رخ میں تبدیلی کی وجہ سے اسلام آباد اور لاہور میں دوپہر کے اوقات میں ایئر کوالٹی انڈیکس میں کچھ عارضی کمی ضرور دیکھی گئی ہے۔ تاہم خشک سردی اور ہوا کی کم رفتار کے باعث میدانی علاقوں میں آلودگی کے ذرات دوبارہ زمین کے قریب جمع ہو رہے ہیں جس سے اسموگ کی شدت برقرار ہے۔

پنجاب کے شہروں اور لاہور کی صورتحال

صوبہ پنجاب اس وقت اسموگ سے سب سے زیادہ متاثر ہے جہاں لاہور میں دوپہر کے وقت معمولی بہتری کے باوجود شام ہوتے ہی ایئر کوالٹی انڈیکس دو سو پچاس سے تجاوز کر جاتا ہے۔ رواں ہفتے لاہور کا فضائی معیار چار سو کی خطرناک حد بھی عبور کر چکا ہے۔ لاہور کے علاوہ جنوبی اور وسطی پنجاب کے دیگر شہروں میں صورتحال مزید ابتر ہے جہاں ملتان میں ایئر کوالٹی انڈیکس تین سو تیس سے پانچ سو سے بھی اوپر ریکارڈ کیا گیا ہے۔

اسی طرح بہاولپور، گوجرانوالہ، قصور، ساہیوال اور ننکانہ صاحب بھی شدید اسموگ کی لپیٹ میں ہیں۔

اسلام آباد، پشاور، کراچی اور کوئٹہ کا حال

وفاقی دارالحکومت اسلام آباد اور راولپنڈی میں بالائی علاقوں کی بارش اور ہوا چلنے سے اسموگ میں معمولی کمی آئی ہے تاہم بلیو ایریا اور صنعتی سیکٹرز میں فضا اب بھی مضرِ صحت ہے۔ پشاور میں ٹریفک کے دھوئیں اور خشک موسم کے باعث ہوا کا معیار خراب ہے البتہ بالائی اضلاع میں بارش سے کچھ بہتری کی امید پیدا ہوئی ہے۔

دسری جانب سمندری ہواؤں کے باعث کراچی کی فضا دیگر بڑے شہروں کے مقابلے میں کافی بہتر ہے جبکہ رات میں ہلکی بارش کا امکان بھی ظاہر کیا گیا ہے۔

ملک کے بڑے شہروں میں کوئٹہ کی فضا سب سے صاف ہے تاہم صبح اور رات کے اوقات میں ٹھنڈ اور ایندھن جلانے سے آلودگی میں کچھ اضافہ دیکھنے میں آتا ہے۔

طبی ماہرین نے پنجاب اور اسلام آباد کے شہریوں کو ہدایت کی ہے کہ وہ گھر سے باہر نکلتے وقت معیاری ماسک کا استعمال لازمی بنائیں۔ صبح سویرے اور رات کے اوقات میں جب اسموگ کی شدت انتہائی زیادہ ہوتی ہے تو غیر ضروری سفر سے گریز کیا جائے اور بچوں و بزرگوں کو گھروں کے اندر رکھا جائے تاکہ سانس کی بیماریوں سے محفوظ رہا جا سکے۔