شکاگو: امریکا میں پاکستانی سفیر مسعود خان نے کہا ہے کہ مسئلہ فلسطین کا حل نوشتہ دیوار ہے، غزہ میں فوری جنگ بندی ہونی چاہیے، انسانی امداد فوری طور پر بحال ہونی چاہیے، فلسطینیوں کے حق خود ارادیت کو تسلیم کیا جانا چاہیے۔
ایسو سی ایشن آف فزیشنز آف پاکستانی ڈیسنٹ آف نارتھ امریکا کے موسم بہار کے اجلاس سے خطاب کرتے ہوئے مسعود خان نے کہاکہ رواں سال 18 ہزار پاکستانی امریکی شہری بنے ہیں، جن میں سے اکثریت ڈاکٹروں اور معالجین کی ہے۔
انہوں نے بتایا کہ ہم نے پاکستان میں بیماریوں کی نگرانی کے لئے امریکی سی ڈی سی کی طرز پر ادارہ قائم کرنے کے لئے امریکا سے تعاون کی درخواست کی ہے، ہم نے غیر متعدی امراض اور بچوں اور زچگی کی اموات کی روک تھام پر بھرپور توجہ دینے کا فیصلہ بھی کیا ہے۔