شاندار کارکردگی، کیپٹن طلحہ نے چاندی کا تمغہ جیت لیا، 33 ممالک نے شرکت کی۔
ترکیہ میں عالمی ملٹری ڈرون مقابلے میں شاندار کارکردگی پر پاکستانی ٹیم کے اعزاز میں تقریب
ترکیہ کے دارالحکومت انقرہ میں منعقدہ عالمی ملٹری ڈرون ٹیم مقابلے میں پاکستان نے شاندار کارکردگی کا مظاہرہ کرتے ہوئے دوسری پوزیشن حاصل کرلی ہے، جس سے پورے ملک کا سر فخر سے بلند ہوگیا ہے۔ عالمی سطح پر افواج پاکستان کی ملٹری ڈرون ٹیم کی مہارت، درستگی اور مسابقتی برتری نے ایک بار پھر ملک کا نام روشن کیا ہے۔
دستاویزات اور دستیاب رپورٹس کے مطابق اس بین الاقوامی مقابلے میں دنیا بھر کے 33 ممالک نے حصہ لیا تھا۔ انفرادی درجے کے مقابلوں میں پاکستان کے کیپٹن طلحہ نے 100 سے زائد عالمی پائلٹس کو پیچھے چھوڑتے ہوئے دوسری پوزیشن حاصل کی اور چاندی کا تمغہ اپنے نام کیا۔
مقابلے کے حتمی نتائج کے مطابق میزبان ملک ترکیہ نے پہلی پوزیشن حاصل کی، پاکستان دوسرے، اٹلی تیسرے جبکہ فرانس چوتھے نمبر پر رہا۔ انٹرنیشنل ملٹری ڈرون مقابلے کے دوران شریک پائلٹس کی پیشہ ورانہ مہارت، رفتار اور مشکل و پیچیدہ رکاوٹوں والے ٹریک پر پرواز کی صلاحیت کا سخت تقابل اور جائزہ لیا گیا۔
ماہرین اور دفاعی تجزیہ کاروں کے مطابق عالمی سطح پر حاصل کی جانے والی یہ شاندار کامیابیاں پاک فوج کی اعلیٰ پیشہ ورانہ تیاری اور جدید دفاعی ٹیکنالوجی کے میدان میں صلاحیتوں کا واضح اور منہ بولتا ثبوت ہیں۔
