کراچی: گزشتہ روز ہونے والے تیز گام ٹرین حادثے کے پیش نظر کوک اسٹوڈیو نے اپنے نئی سیزن کی تیسری قسط جاری کرنے سے معذرت کرلی ہے۔
کراچی سے راولپنڈی جانے والی تیز گام ایکسپریس میں گزشتہ روز آگ بھڑک اٹھنے کے نتیجے میں 74 مسافر جاں بحق اور 90 سے زائد زخمی ہوگئے تھے، افسوس ناک سانحے پر شوبز انڈسٹری سمیت دنیا بھر سے تعزیتی پیغام بھیجے گئے اور اب کوک اسٹوڈیو کی جانب سے بھی ہولناک سانحے کے باعث اپنی نئی قسط جاری نہ کرنے کا فیصلہ کیا گیا ہے۔
حال ہی میں کوک اسٹوڈیو کا 12 واں سیزن شروع کیا گیا جس کے اب تک کئی گیت ریلیز کے فوراً بعد ہی مقبول ترین گیتوں کی فہرست میں شامل ہو گئے ہیں اور آج کے روز اس سیزن کی تیسری قسط ریلیز کی جانی تھی تاہم کوک اسٹوڈیو کی انتظامیہ نے ٹرین حادثے کے پیش نظر یہ قسط ریلیز کرنے سے معذرت کرلی ہے۔
In solidarity with the families affected by the Tezgam train tragedy, Coke Studio Season 12 Episode 3 will not be releasing today. pic.twitter.com/ABvvHmF1Zn
— Coke Studio (@cokestudio) November 1, 2019
کوک اسٹوڈیو کی جانب سے سماجی رابطے کی ویب سائٹ ٹوئٹر پر ایک ٹوئٹ کی گئی جس میں انہوں نے تیز گام ٹرین حادثے میں شہدا اور زخمیوں کے اہل خانہ سے اظہار افسوس کیا، ساتھ ہی یہ بھی کہا کہ کوک اسٹوڈیو سیزن 12 کی تیسری قسط ریلیز نہیں کی جائے گی۔
یہ خبر بھی پڑھیں: رحیم یار خان؛ تیزگام ایکسپریس میں آتشزدگی سے 74 مسافر جاں بحق اور 90 زخمی
ٹوئٹ میں یہ بھی کہا گیا کہ ہماری دعائیں حادثے میں متاثر ہونے والے خاندانوں کے ساتھ ہیں۔