گیس کی عدم فراہمی کے باعث نارتھ کراچی کی 80 فیصد صنعتوں میں پیداواری سرگرمیاں تعطل کا شکار ہوگئی ہیں
سیکڑوں لوگوں کے بیروز گار ہونے کا خدشہ، بڑی تعداد میں برآمدی آرڈر منسوخ ہونے کے خدشات بھی بڑھ گئے
کراچی(کامرس رپورٹر)نارتھ کراچی صنعتی ایریا میں صنعتوں کو طلب کے مطابق گیس کی عدم فراہمی کے باعث80فیصد صنعتوں میں پیداواری سرگرمیاں بند ہیں جبکہ فیکٹریوں میں پیداوار تعطل کا شکار ہو گئی ہے جس کے نتیجے میں سیکڑوں افراد کے بے روزگار ہونے کے علاوہ برآمدی شپمنٹ بروقت نہ ہونے کی صورت میں بڑی تعداد میں برآمدی آرڈرزمنسوخ ہونے کے خدشات بڑھ گئے ہیں۔نارتھ کراچی ایسوسی ایشن آف ٹریڈ اینڈ انڈسٹری (نکاٹی) نے برآمدی صنعتوں کو تباہی سے بچانے کے لیے حکومت سے سی این جی سیکٹر کو2ماہ کے لیے گیس کی فراہمی معطل کرنے کا مطالبہ کیا ہے اور ساتھ ہی یہ درخواست بھی کی ہے کہ گیس بحران پر قابوپانے تک گاڑیوں کو پیٹرول پر رواں دواں رکھنے کی حکمت عملی اختیار کی جائے۔