جرمنی کے ایک وزیر نے یونانی سرحد پر تارکین وطن کے لیے قائم کیمپوں کی صورتحال کو شرمناک قرار دے دیا۔
اقتصادی تعاون اور ترقی کے وزیر گیرڈ مولر نے جرمن روزنامہ رائنس پوسٹ کے ساتھ ایک انٹرویو میں کہا یہ شرمناک بات ہے کہ اس طرح کے حالات کو یورپ کے وسط میں قبول کرلیا گیا ہے۔
مولر نے کیمپوں کی صورتحال پر تنقید کرتے ہوئے کہا کہ 3 ہزار کی گنجائش والے کیمپوں میں 20 ہزار افراد کو ٹھہرایا گیا ہے، حکام کو ان کیمپوں میں مہاجرین کے حقوق اور وقار کو یقینی بنانا ہوگا۔
جرمن وزیر کا کہنا تھا کہ کیمپوں سے بچوں کا انخلا مسئلے کا حل نہیں ہے۔
واضح رہے کہ حال ہی میں جرمنی نے پناہ گزینوں کا دباؤ کم کرنے کے لیے یونان سے دیگر یورپی ممالک میں تقسیم کے معاہدے کے تحت 47 بچوں کو ملک میں پناہ دی ہے۔