کورونا حملہ جنگ عظیم دوئم، پرل ہاربر اور 9-11 سے بھی بدتر ہے، ٹرمپ

واشنگٹن (اے پی پی) امریکی صدر ڈونلڈ ٹرمپ نے کورونا وائرس کے حملے کو امریکا پر اب تک کا بدترین حملہ قرار دیتے ہوئے کہا ہے کہ کورونا وائرس کا حملہ جنگ عظیم دوئم میں امریکی بندرگاہ پرل ہاربر اور 9/11 حملوں سے بھی بدتر ہے۔ برطانوی خبر رساں ادارے کے مطابق امریکی صدر ٹرمپ نے وائٹ ہائوس کے اوول آفس میں صحافیوں سے گفتگو کرتے ہوئے کہا کہ امریکا کورونا وائرس کے بدترین حملے سے گزرا ہے اور اس جیسا حملہ آج تک کبھی نہیں ہوا۔ انہوں نے کہا کہ کورونا وائرس کو اس کے ماخذ یعنی چین میں روکا جا سکتا تھا اور ایسا نہیں ہوا۔ انہوں نے چین کے بجائے کورونا وائرس کو امریکا کا دشمن قرار دیتے ہوئے کہا کہ وہ نہ دکھائی دینے والے دشمن کورونا وائرس کو جنگ کے طور پر دیکھتے ہیں، وہ نہیں جانتے کہ یہ دشمن امریکا کیسے پہنچا۔