ترکی کے سفیر کی سربراہ پاک فضائیہ سے ملاقات
ترکی کے سفیر احسان مصطفی یوردکول نے سربراہ پاک فضائیہ ایئر چیف مارشل ظہیر احمد بابر سدھو سے ان کے دفتر میں ملاقات کی۔ معزز سفیر نے پاک فضائیہ کی کمان سنبھالنے پر ایئر چیف کو مبارکباد پیش کی۔ دونوں معززین نے پیشہ وارانہ اور باہمی دلچسپی کے امور پر تبادلہ خیال کیا۔
معزز سفیر نے پاک فضائیہ کی پیشہ وارانہ مہارت کی تعریف کی اور کہا کہ دونوں ممالک کے عوام کے مابین مذہب اور ثقافت سے جڑا اخوت اور بھائی چارے کا ایک مضبوط رشتہ قائم ہے ۔
ایئر چیف نے کہا کہ اس سے قطع نظر کہ صورتحال کیسی ہی کیوں نہ ہو دونوں ممالک ہمیشہ ایک دوسرے کے شانہ بشانہ کھڑے رہے ہیں ۔ انہوں نے یہ بھی کہا کہ ترکی ان چند ممالک میں شامل ہے جنہوں نے ہر موقع پر پاکستان کی بلاشرکت غیرے حمایت کی ۔ ایئر چیف نے اس بات کی یقین دہانی کرائی کہ دونوں ملکوں کی فضائی افواج ہر شعبے میں باہمی تعاون جاری رکھیں گی۔