تلنگانہ(ساوتھ ایشین وائر)تلنگانہ کے وزیر اعلی کے چندر شیکھر را نے کہا ہے کہ دلت لوگ اپنا مذہب تبدیل کر رہے ہیں۔ کیونکہ انہیں معاشرے میں عزت واحترام نہیں دیا جارہا ۔ساوتھ ایشین وائر کے مطابق تلنگانہ کے کاماریڈی میں جلسہ عام سے خطاب کرتے ہوئے تلنگانہ کے وزیر اعلی نے کہا، "بھارت میں غربت اب بھی موجود ہے اور اس ملک میں ابھی بھی دلتوں کی صورتحال کو بہتر بنانے کی ضرورت ہے۔”
کے سی آر نے کہا ، "اگر دلت مذہب تبدیل کرکے دوسرے مذہب اپنا رہے ہیں تو یہ ہمارا قصور ہے کہ ہم ان کی حفاظت کرنے سے قاصر ہیں۔ جیسے ہی وہ دوسرا مذہب قبول کرتے ہیں، انہیں احترام ملتا ہے جو انھیں ایک دلت کی حیثیت سے نہیں ملا۔”ان کا مزید کہنا تھا کہ وہ خود ہندو ہیں اور برا محسوس کرتے ہیں جب وہ دیکھتے ہیں کہ دلت غربت کی وجہ سے اب بھی مناسب زندگی گزارنے سے محروم ہیں۔ انہوں نے مزید کہا، "اس ملک کے ہر فرد کو ان غریبوں اور دلتوں کو غربت سے نکلنے میں مدد کے لئے آگے بڑھنا چاہئے۔”