اسلام آباد ایئرپورٹ کے وی وی آئی پی لاؤنج میں سانپ نکل آیا جس سے لوگوں میں بھگدڑ مچ گئی۔
ایکسپریس نیوز کے مطابق اسلام آباد ایئرپورٹ کے وی وی آئی پی لاؤنج میں سانپ نکل آنے کا عجیب واقعہ پیش آیا ہے۔ سانپ کی موجودگی کی اطلاع ملنے پر مسافروں میں خوف و ہراس پھیل گیا اور وہ محفوظ جگہوں کے لیے دوڑ گئے جب کہ عملے کی بھی دوڑیں لگ گئیں۔
ذرائع کے مطابق سانپ ایک میٹر طوالت کا حامل تھا، سول ایوی ایشن اتھارٹی نے فوری طور پر عملے کو طلب کیا جس نے سانپ کو لاٹھیوں سے کچل دیا۔
اطلاعات کے مطابق سانپ سے کسی شخص کو کوئی نقصان نہیں پہنچا، عملہ و مسافر محفوظ رہے، اس بات کی تحقیقات کی جارہی ہیں کہ سانپ کہاں سے آیا اور وی وی آئی پی لاؤنج تک کیسے پہنچ گیا؟