سرینا موبائل مارکیٹ میں نقب زنی کی واردات کے دوران ملزمان 4 سے زائد دکانوں سے لاکھوں روپے مالیت کے موبائل فونز، ایسیریز اور نقدی چوری کرکے فرار ہوگئے، پولیس نے نااہلی چھپانے کے لیے دکان داروں پر دباؤڈالنا شروع کردیا۔
تفصیلات کے مطابق تیموریہ تھانے کی حدود میں واقع سرینا موبائل مارکیٹ میں نامعلوم ملزمان 4 سے زائد دکانوں کے تالے توڑ کر لاکھوں روپے مالیت کے موبائل فونز ، ایسیسیریز اور نقدی لوٹ کر فرارہوگئے۔ دکان داروں کے مطابق وہ آج صبح جب دکان کھولنے مارکیٹ پہنچے تو واردات کا علم ہوا، اس کے بعد پولیس اور مارکیٹ کی یونین کو آگاہ کیا گیا۔
متاثرہ دکان داروں کا کہنا ہے کہ مارکیٹ یونین اور پولیس ہم پر دباؤ ڈال رہی ہے کہ مقدمہ محرم الحرام کے بعد درج کرایا جائے جو کے سراسر غلط ہے۔ پولیس ہم سے تعاون نہیں کر رہی جب کہ یونین بھی ہمیں مقدمہ درج کرانے سے منع کررہی ہے۔
متاثرہ دکان داروں نے افسران بالا سے اپیل کی ہے کہ واقعے میں ملوث ملزمان کو گرفتار کیا جائے اور متعلقہ تھانے کے خلاف بھی کارروائی عمل میں لائی جائے ،