وزیراعظم عمران خان کی چوہدری برادران سے ملاقات، اپوزیشن کی تحریک عدم اعتماد پر تبادلہ خیال

وزیراعظم عمران خان نے پاکستان مسلم لیگ (ق) کی قیادت سابق وزیراعظم چوہدری شجاعت حسین اور اسپیکر پنجاب اسمبلی پرویز الہٰی سے ملاقات کی جہاں ملک کی سیاسی صورت حال اور اپوزیشن کی جانب سے تحریک عدم اعتماد کی کوششوں پر ان کی حمایت پر گفتگو کی۔

سماجی رابطے کی ویب سائٹ ٹوئٹر پر وزیراعظم کے دفتر سے جاری بیان کے مطابق وزیراعظم عمران خان نے اپنے دورہ لاہور کے موقع پر پاکستان مسلم لیگ (ق) کے صدر اور سابق وزیراعظم چودھری شجاعت حسین اور اسپیکر پنجاب اسمبلی چودھری پرویزالہٰی سے ان کی رہائش گاہ پر ملاقات کی۔

ملاقات کے موقع پر وزیراعلیٰ پنجاب عثمان بزدار، مشیر تجارت عبدالرزاق داؤد، وفاقی وزیر اطلاعات فواد چوہدری اور سالک حسین سمیت دیگر وفاقی وزرا بھی موجود تھے۔

چوہدری شجاعت حسین کے بیٹے شافع حسین نے بتایا کہ ملاقات خوش گوار ماحول میں ہوئی اور گفتگو وزیراعظم کے دورہ روس کے حوالے سے تھی۔

وزیراعظم پاکستان عمران خان کی سابق وزیراعظم چودھری شجاعت حسین اور سپیکر پنجاب اسمبلی چودھری پرویزالٰہی سے ملاقات

وزیراعظم عمران خان نے چودھری شجاعت حسین کی خیریت دریافت کی pic.twitter.com/DOzU369gqJ

— Prime Minister’s Office, Pakistan (@PakPMO) March 1, 2022

ملاقات کے بعد جاری اعلامیے کے مطابق وزیراعظم اور چوہدری بردران کے درمیان ملاقات میں ملک کی سیاسی صورت حال اور باہمی دلچسپی کے دیگر امور پر تفصیل سے گفتگو کی گئی جبکہ وزیراعظم نے چوہدری شجاعت حسین کی خیریت دریافت کی۔

وزیراعظم عمران خان نے چودھری شجاعت حسین سے کہا کہ میں اللہ تعالیٰ سے آپ کی جلد مکمل صحت یابی کے لیے دعا گو ہوں۔

وزیراعظم نے روس کے دورے کے بارے میں چوہدری برادران کو آگاہ کیا۔

چوہدری برادران نے وزیراعظم سے گفتگو کے دوران کہا کہ مہنگائی نے عوام کا جینا دو بھر کر دیا ہے، اس پر بھی کچھ سوچیں جبکہ مہنگائی کی روک تھام کے حوالے سے اقدامات سے اتحادی جماعت کو آگاہ کیا گیا۔

اس موقع پر چودھری شجاعت حسین نے وزیراعظم کی جانب سے پیٹرول اور بجلی کی قیمتوں میں کمی کے اعلان کو سراہتے ہوئے کہا کہ اب اپنے وزیروں کی ڈیوٹی لگائیں کہ وہ بازاروں میں بھی قیمتوں کی کمی پر نظر رکھیں تاکہ عوام کو نچلی سطح تک اس کا فائدہ پہنچ سکے۔

چودھری پرویزالہٰی نے کہا کہ صنعتوں کی بحالی کے لیے پیکیج کا اعلان بڑا اچھا ہے، پنجاب کی انڈسٹریل اسٹیٹس کے لیے بھی ایسے ہی پیکیج کا اعلان کیا جائے۔

وزیراعظم عمران خان نے پرویز الہٰی کی تجویز کو سراہتے ہوئے کہا کہ یہ بڑی اچھی تجویز ہے، اس میں پنجاب کی صنعتوں کو بھی شامل کیا جائے گا۔

چودھری برادران نے وزیراعظم کے دورہ روس کی بھی تعریف کی اور کہا کہ آپ کا دورہ انتہائی اہمیت کا حامل تھا اور اس دورے کے پاکستان کی معیشت پر دور رس نتائج ہوں گے۔

خیالرہے کہ اپوزیشن کی جانب سے حکومت کے خلاف تحریک عدم اعتماد لانے کے اعلان کے بعد پاکستان مسلم لیگ (ن) کے صدر شہباز شریف، پاکستان ڈیموکریٹک موومنٹ کے سربراہ مولانا فضل الرحمٰن اور دیگر جماعتوں کے رہنماؤں نے چوہدری شجاعت حسین اور چوہدری پرویز الہٰی سے ملاقاتیں کی تھیں.

شہباز شریف نے چوہدری برادران سے ملاقات کے دوران حکومت کے خلاف تحریک عدم اعتماد کے لیے مدد بھی مانگ لیا تھا.

بعد ازاں وزیراعظم عمران خان نے اپوزیشن رہنماؤں کی چوہدری برادران سے ملاقات پر تنقید کرتے ہوئے کہا تھا کہ جو لوگ گھبرائے ہوئے ہیں انہیں چوہدری صاحب کی صحت کا خیال آگیا ہے۔

پاکستان میں ہائیڈرو پاور ڈیولپمنٹ کے حوالے سے بین الاقوامی سیمپوزیم کی تقریب سے خطاب کرتے ہوئے وزیر اعظم نے مونس الٰہی کے اس بیان پر کہ تحریک انصاف کو سیاسی ملاقاتوں سے گھبرانا نہیں چاہیےپر کہا تھا کہ ان کی صحت کا اچانک یاد آنا، یہ وہ گھبرائے ہوئے لوگ ہیں جو اپنے ورکرز اور اراکین اسمبلی کی 20، 20 سال پرانی فوتگی پر تعزیت کے لیے جارہے ہیں۔

مونس الہٰی کو مخاطب کرتے ہوئے انہوں نے مزید کہا تھا کہ ہمیں آپ پر اور اپنے کے خاندان پر پورا اعتماد ہے، شاید ہی پاکستان میں کسی کے پاس وہ سیاسی صلاحیت ہو جو چوہدری صاحب کے پاس ہے۔

منبع: ڈان نیوز