بچوں کی تعلیم اور ان کو زندگی میں بہترین مقام پر پہنچانے کیلئے والدین ہمیشہ قربانیاں دیتے ہیں اور جب یہی بچے پڑھ لکھ کر معاشرے میں کسی اعلیٰ عہدے پر فائز ہوتے ہیں تو ماں باپ کیلئے باعث فخر ہوتا ہے۔
ایک ایسا ہی واقعہ بھارت میں پیش آیا جہاں بھارتی پنجاب کے رکن اسمبلی نے اس اسکول میں مہمان خصوصی شرکت کی جہاں ان کی والدہ صفائی ستھرائی کا کام کرتی ہیں۔
بھارتی میڈیا رپورٹس کے مطابق پنجاب کے ممبر قانون ساز اسمبلی (ایم ایل اے) لبھ سنگھ اوگوک نے ایک سرکاری اسکول میں بحیثیت مہمان خصوصی شرکت کی جہاں ان کی والدہ گزشتہ 25 سال سے جھاڑو لگانے کا کام کر رہی ہیں۔
Punjab| AAP MLA from Bhadaur, Labh Singh Ugoke, reached a govt school in Ugoke village as Chief Guest where his mother Baldev Kaur has been working as a sanitation worker for last 25yrs
"It’s a matter of great pride, I’m very happy that my son has become an MLA,”she says (05.04) pic.twitter.com/EevndNEp1z
— ANI (@ANI) April 6, 2022
اس موقع پر ایم ایل اے کی والدہ کا کہنا تھا کہ مجھے خوشی اور فخر ہے کہ میرا بیٹا رکن اسمبلی بن گیا، لبھ خود بھی اسی اسکول میں پڑھتے تھے۔
لبھ سنگھ کی والدہ کا کہنا ہے کہ ہم نے ہمیشہ پیسہ کمانے کے لیے سخت محنت کی ہے اور میرے بیٹے کے اعلیٰ عہدے پر فائز ہونے کے باوجود میں اسکول میں اپنا فرض ادا کرتی رہوں گی۔
بھارتی میڈیا کے مطابق عام آدمی پارٹی (اے اے پی) کے رہنما لبھ سنگھ نے حال ہی میں پنجاب کے سابق وزیر اعلیٰ چرنجیت سنگھ کو تقریباً 37 ہزار ووٹوں سے شکست دی۔
لبھ سنگھ نے 2013 میں عام آدمی پارٹی میں شامل ہونے کے بعد پارٹی میں کافی جلدی نمایاں جگہ حاصل کی، سیاست میں آنے سے پہلے وہ موبائل کی مرمت کے ایک چھوٹے سے اسٹور میں کام کرتے تھے۔